గంపగుత్త ఓట్లకు కాలం చెల్లు

ప్రభావం చూపలేక పోతున్న స్థానిక నేతలు

ప్రశ్న: అమ్మా.. మీ ఓటెవరికి?
సమాధానం: నేను చెప్పను బిడ్డా.. ఎవరికో ఒకరికి ఓటేయాలి కదా..!
ప్రశ్న: మీ బస్తీ నాయకులు ఎవరికి వేయమని అంటున్నారు ?
సమాధానం: మా ఇష్టమొచ్చినోళ్లకు వేస్తాం.

ఇదీ.. ఓటు ఎవరికి వేస్తావని నగరంలోని పలువురిని అడిగితే వచ్చిన సమాధానం. ఓటర్లపై గతంలో మాదిరి.. బస్తీ నాయకుడో, చోటామోటా నాయకుల ప్రభావమో అంతగా కనిపించడంలేదు. వారు చెబితే మొత్తం ఓట్లన్నీ గంపగుత్తగా మనకే పడతాయనే నమ్మకాలు లేవిప్పుడు. బస్తీ, కాలనీ నేతలు, సంఘాల ప్రతినిధులు.. ఫలానా పార్టీకే ఓటేయాలని హుకుం జారీచేసే రోజులు పోయాయి.

పటిష్ఠ నాయకత్వం లేకే..

గతంలో చాలా మంది నాయకులు నిస్వార్థంగా పనిచేస్తూ తమ బస్తీకి, కాలనీవారికి సంక్షేమ పథకాలందేలా చూసేవారు. ఇప్పుడు చాలా మంది స్థానిక నేతలు.. తన మన అనే తేడాలేకుండా..పథకమేదైనా అందినకాడికి డబ్బు గుంజుతున్నారు. దీంతో వారు ఓటర్లను ప్రభావితం చేసే స్థాయిని కోల్పోయారు. బెదిరించే పరిస్థితులూ లేవు.
ఈనాడు, హైదరాబాద్‌