కాపలాదారులు లేక వెలవెల

పోలింగ్‌కు సొంతూర్లకు ప్రయాణం

ఈనాడు- హైదరాబాద్‌: ఎన్నికల ప్రభావంతో రాజధానిలో అపార్టుమెంట్లు కాపలాదారులు లేక వెలవెలబోతున్నాయి. పోలింగ్‌ కోసం నగరంలోని వివిధ ప్రాంతాలకు చెందిన లక్షలాదిమంది బుధవారం సొంతూర్లకు ప్రయాణమయ్యారు. ఇలా వెళ్లిన వారిలో ఎక్కువ మంది అపార్టుమెంట్లు, గేటెడ్‌ కమ్యూనిటీల్లో కాపలా, ఇతర పనులు చేస్తూ ఉపాధి పొందుతున్నవారే.  కొందరు  కుటుంబాలతో సహా వెళ్లిపోయారు. ఓటేయాలన్న తాపత్రయంతో వెళ్లిన వారు కొందరైతే, మరికొందరు వివిధ పార్టీలు డబ్బు పంచుతున్నాయనే సమాచారంతో బయలుదేరారు. నగరంలోని అపార్టుమెంట్లలో భద్రత, నీటి సరఫరా, ఇస్త్రీ, ఇతర చిన్నాచితకా పనులన్నీ వీరే చూసుకుంటారు.  ఒకేసారి రెండు, మూడ్రోజులు సెలవు పెట్టి  వెళ్లడంతో ఆయా పనులకు ఇబ్బంది ఎదురవుతోందని, రాత్రి వేళ భద్రత కోసం తాత్కాలికంగా ఎవరినైనా వెతుక్కోవాల్సి వస్తోందని స్థానికులు చెబుతున్నారు.