పార్కిన్‌సన్స్‌ రోగులకు నిమ్స్‌లో ప్రత్యేక చికిత్స

అవగాహన నడకలో నిమ్స్‌ డైరెక్టర్‌ బీరప్ప, న్యూరాలజీ వైద్యులు

ఈనాడు,హైదరాబాద్‌: పార్కిన్‌సన్స్‌ రోగుల కోసం నిమ్స్‌లో ప్రత్యేక చికిత్సలను అందిస్తున్నట్లు నిమ్స్‌ ఆస్పత్రి డైరెక్టర్‌ బీరప్ప చెప్పారు. జన్యుపరమైన లోపాలు, ఇతర కారణాలతో శరీర కదలికల్లో మార్పులతో చాలామంది అవస్థలు పడుతున్నారన్నారు. బుధవారం ఆస్పత్రిలో ‘ప్రపంచ మూవ్‌మెంట్‌ డిజార్డర్‌’ సందర్భంగా నిర్వహించిన అవగాహన నడకలో పాల్గొని మాట్లాడారు. ఈ వ్యాధి పుట్టుకతో కొంతమందికి వస్తే మరికొంతమందికి వృద్ధాప్యంలో వస్తుందన్నారు. అలాంటి వ్యాధులను గుర్తించేందుకు ఆస్పత్రిలో న్యూరాలజీ విభాగం ఆధ్వర్యంలో ప్రత్యేక బృందం పనిచేస్తోందన్నారు. కార్యక్రమంలో న్యూరాలజీ విభాగాధిపతి అప్షన్‌ జబీన్‌, వైద్యులు సూర్యప్రభ, శిరీష, భవాణి, మహేశ్‌, పీఆర్‌వో సత్యాగౌడ్‌ పాల్గొన్నారు.