‘ఎగుమతిదార్ల అవసరాలు తీర్చేందుకు ఎస్‌బీఐ సిద్ధం’

ఈనాడు, హైదరాబాద్‌:  ఎస్‌బీఐ హైదరాబాద్‌ సర్కిల్‌ గురువారం ఎగుమతిదార్ల సమావేశం నిర్వహించింది. ఎస్‌బీఐ ఎండీ (ఇంటర్నేషనల్‌ బ్యాంకింగ్‌) చల్లా శ్రీనివాసులు శెట్టి, డిప్యూటీ ఎండీలు నంద్‌ కిషోర్‌, అమితవ ఛటర్జీ, హైదరాబాద్‌ సర్కిల్‌ జీఎం (నెట్‌వర్క్‌-1) మంజు శర్మ హాజరయ్యారు. ఎగుమతి వ్యాపారంలో నిమగ్నమైన ఎస్‌ఎంఈలకే కాకుండా పెద్ద కార్పొరేట్‌ సంస్థలకూ ఎస్‌బీఐ చేయూత అందిస్తున్నట్లు శ్రీనివాసులు శెట్టి చెప్పారు. గత ఆర్థిక సంవత్సరంలో రూ.2.60 లక్షల కోట్ల మేరకు ఎగుమతుల రుణాలు అందించడం ద్వారా, ఈ విభాగంలో 18 శాతం మార్కెట్‌ వాటా లభించిందన్నారు. ఎఫ్‌ఐఈఓ, ఎఫ్‌టీసీసీఐ, ఈసీజీసీ  సంస్థల ప్రతినిధులు పాల్గొని ఎగుమతిదార్ల సమస్యలను ఎస్‌బీఐ ఉన్నతాధికారుల ముందు ప్రస్తావించారు.