పట్టించుకోనందుకే కాంగ్రెస్‌లో చేరా: స్వప్న

స్వప్న మెడలో కండువా వేస్తున్న ముఖ్యమంత్రి

తాండూరు, తాండూరు టౌన్‌, న్యూస్‌టుడే: భారాస పార్టీ నుంచి తాండూరు మున్సిపల్‌ అధ్యక్షురాలిగా కొనసాగినా స్వపక్షమే తనను తీవ్ర ఇబ్బందులకు గురిచేసిందని, అందుకే కాంగ్రెస్‌లో చేరానని తాటికొండ స్వప్న తెలిపారు. ఆమె బుధవారం భారాసకు రాజీనామా చేసి కోస్గిలో జరిగిన సభలో ముఖ్యమంత్రి రేవంత్‌ రెడ్డి సమక్షంలో కాంగ్రెస్‌ పార్టీలో చేరారు. ఈ సందర్భంగా ఆమె ‘న్యూస్‌టుడే’తో మాట్లాడారు. పట్టణ అభివృద్ధి పరంగా కౌన్సిలర్లు, మాజీ ఎమ్మెల్యే సహకరించలేదని తెలిపారు. ఈ నేపథ్యంలో తనకు జరుగుతున్న ఇబ్బందిని భారాస ప్రభుత్వంలోని అధినాయకులకు  పలుమార్లు వివరించినా స్పందన లేకపోయిందని వాపోయారు.  తాండూరు పట్టణాన్ని అభివృద్ధి చేయాలనే ఉద్దేశంతో భారాసను వీడి కాంగ్రెస్‌ పార్టీలో చేరానని చెప్పారు.