సమయ పాలన తప్పితే చర్యలు: డీఈఓ

మల్లారెడ్డి గూడెంలో ఉపాధ్యాయురాలితో మాట్లాడుతున్న డీఈఓ రేణుకాదేవి

న్యూస్‌టుడే, తాండూరు, పూడూరు, మోమిన్‌పేట, కుల్కచర్ల గ్రామీణ: సమయపాలన పాటించని ఉపాధ్యాయులపై చర్యలు తప్పవని జిల్లా విద్యాధికారిణి రేణుకాదేవి హెచ్చరించారు. ‘సమయానికి రాక..నామమాత్రమే!’ శీర్షికన బుధవారం ‘ఈనాడు’లో ప్రచురితమైన కథనానికి డీఈఓ రేణుకా దేవి మొదలు ఎంఈఓల వరకు స్పందించి పాఠశాలలను సందర్శించారు.

మోమిన్‌ పేట మండల పరిధిలోని మల్లారెడ్డి గూడెం మండల పరిషత్తు ప్రాథమిక పాఠశాలను జిల్లా విద్యాధికారిణి రేణుకాదేవి ఆకస్మికంగా తనిఖీ చేసి విద్యార్థుల వివరాలు తెలుసుకొని రికార్డులను పరిశీలించారు. విధులకు సమయానికి ఎందుకు ఆలస్యంగా హాజరు కావాల్సి వచ్చిందో విచారించి నివేదిక ఇవ్వాలని ఎంఈవో గోపాల్‌ను ఆదేశించారు. అనంతరం అమ్రాదికలాన్‌ గ్రామంలో పాఠశాలను ఆమె సందర్శించారు. కార్యక్రమంలో మండల ఇన్‌ఛార్జి విద్యాధికారి గోపాల్‌, ఉపాధ్యాయులు తదితరులు పాల్గొన్నారు.

ఉపాధ్యాయులకు తాఖీదులు జారీ: డీఈఓ రేణుకాదేవి సూచన మేరకు తాండూరులోని సాయిపూరు ప్రాథమిక పాఠశాలను బుధవారం మండల విద్యాధికారి వెంకటయ్య సందర్శించారు. పాఠశాలకు సమయానికి రాని ఇద్దరు ఉపాధ్యాయులపై విచారణ జరిపి తాఖీదులు జారీ చేశారు. నివేదికను జిల్లా విద్యాధికారికి పంపించినట్లు తెలిపారు.

పూడూరు ఎంఈఓ హరిశ్చందర్‌, మన్నెగూడ కాంప్లెక్స్‌ ఛైర్మన్‌ రత్నలు మీర్జాపూర్‌ ప్రాథమిక పాఠశాలను సందర్శించారు. ఉపాధ్యాయుల హాజరు సమయ పాలన బాగుందని గుర్తించారు.

కుల్కచర్ల మండల విద్యాధికారి అబీబ్‌ అహ్మద్‌ బుధవారం అంతారం ప్రాథమికోన్నత పాఠశాలను సందర్శించారు. ఉపాధ్యాయుడు ఆలస్యంగా రావడానికి గల కారణాలు, విద్యార్థులతో మాట్లాడి సమస్యలు తెలుసుకున్నారు.