కళ్లలో కారం చల్లి, కత్తులతో పొడిచి

సెకండ్‌హ్యాండ్‌ కార్ల వ్యాపారి దారుణ హత్య

ఉప్పల్‌, న్యూస్‌టుడే: కళ్లలో కారం చల్లి.. కత్తులతో పొడిచి ఓ వ్యక్తిని దారుణంగా హత్య చేశారు. ఉప్పల్‌ పోలీసుల కథనం ప్రకారం.. సికింద్రాబాద్‌కు చెందిన పుస్తకాల సాయికుమార్‌(43) సెకండ్‌హ్యాండ్‌ కార్ల వ్యాపారి. ఆయన గతంలో చిలుకానగర్‌ డివిజన్‌ ఆదర్శనగర్‌లో ఉండేవారు. బుధవారం రాత్రి ఉప్పల్‌ వెలుగుగుట్ట ప్రాంతంలో సాయికుమార్‌పై గుర్తు తెలియని వ్యక్తులు కత్తులతో దాడి చేశారు. తీవ్రంగా గాయపడిన సాయికుమార్‌ను గాంధీకి తరలించగా.. చికిత్స పొందుతూ గురువారం మృతి చెందాడు.

తల్లీకూతురు పనేనా..?: సాయికుమార్‌ ఆదర్శనగర్‌లో ఉండే సమయంలో ఓ మహిళతో వివాహేతర సంబంధం ఉన్నట్టుగా తెలిసింది. ఆమె కొంతకాలంగా సాయికుమార్‌ను దూరం పెడుతున్నప్పటికీ అతడు వెంటపడుతున్నాడు. దీంతో అతడ్ని హతం చేసేందుకు కూతురితో కలిసి పథకం వేసినట్లు తెలిసింది. సాయికుమార్‌ను వెలుగుగుట్ట ప్రాంతానికి రప్పించి మరో ఇద్దరితో కలిసి కళ్లలో కారం చల్లి, కత్తులతో పొడిచి దారుణంగా హత్య చేసినట్టుగా సమాచారం.