60 ఏళ్లలో జరగని అభివృద్ధి పదేళ్లలో జరిగింది

మాట్లాడుతున్న మురళీధర్‌రావు

ఇబ్రహీంపట్నం, యాచారం, న్యూస్‌టుడే: దేశంలో అరవై ఏళ్ల కాంగ్రెస్‌ అధికారంలో జరగని అభివృద్ధి.. పదేళ్ల ప్రధాని మోదీ పాలనలో జరిగిందని భాజపా జాతీయ నాయకుడు, మధ్యప్రదేశ్‌ భాజపా ఇన్‌ఛార్జి మురళీధర్‌రావు తెలిపారు. భాజపా నిర్వహిస్తున్న విజయ సంకల్ప యాత్ర శుక్రవారం యాచారం, మంచాల మీదుగా రాత్రి ఇబ్రహీంపట్నం చేరుకుంది. భాజపా అసెంబ్లీ కన్వీనర్‌ ఎన్ను యాదగిరిరెడ్డి అధ్యక్షతన అంబేడ్కర్‌ చౌరస్తాలో సభ నిర్వహించారు. ఈ సభలో మురళీధర్‌రావు మాట్లాడారు. నాడు కాంగ్రెస్‌.. దేశ అభివృద్ధిని విస్మరించి అవినీతి పాలన సాగించిందని, నేడు భాజపా పాలనలో ప్రపంచంలోనే ఎక్కడాలేని విధంగా ఆదర్శంగా పనిచేస్తోందని వివరించారు. దేశంలో 50 కోట్ల మంది పేదలకు ఫ్రీ బ్యాంకు ఖాతాలు తెరిచి ఇచ్చిన ఘనత మోదీ సర్కారుకే దక్కుతుందన్నారు. మరోసారి కేంద్రంలో భాజపా ప్రభుత్వం అధికారంలోకి వస్తే అభివృద్ధి చెందిన దేశాల సరసన.. మన దేశం నిలుస్తుందన్నారు. కార్యక్రమంలో కామారెడ్డి, అర్మూర్‌ ఎమ్మెల్యేలు కాటేపల్లి వెంకటరమణారెడ్డి, రాకేష్‌రెడ్డి, భాజపా రాష్ట్ర ఉపాధ్యక్షుడు మనోహర్‌రెడ్డి, యాత్ర ప్రముఖ్‌ కాసం వెంకటేశ్వర్లు, మాజీ ఎంపీ బూర నర్సయ్యగౌడ్‌, రాష్ట్ర నాయకులు పాల్గొన్నారు.