బంజారాహిల్స్‌లో హోంగార్డుపై దాడి చేసింది సినీనటి

జూబ్లీహిల్స్‌, న్యూస్‌టుడే: అపసవ్య దిశలో రావడమే కాకుండా విధుల్లో ఉన్న ట్రాఫిక్‌ సిబ్బందిపై దురుసుగా ప్రవర్తించి దాడికి పాల్పడిన మహిళ సినీనటి సౌమ్య జానుగా బంజారాహిల్స్‌ పోలీసులు గుర్తించారు. ఈనెల 24న రాత్రి బంజారాహిల్స్‌ రోడ్‌ 12లోని అగ్రసేన్‌ కూడలిలో రాంగ్‌రూట్‌లో జాగ్వర్‌ కారులో వచ్చిన మహిళ అక్కడ విధుల్లో ఉన్న బంజారాహిల్స్‌ ట్రాఫిక్‌ హోంగార్డు విఘ్నేష్‌తో దురుసుగా ప్రవర్తించి, లైఫ్‌జాకెట్‌ చించివేసి, చేతిలోని చరవాణిని లాక్కొని పగులగొట్టిన సంగతి విదితమే. దాడికి పాల్పడినది సినీనటి సౌమ్యజాను అని గుర్తించి ఆమెకు నోటీసులు ఇచ్చేందుకు ప్రయత్నించగా ఇంటి వద్ద అందుబాటులో లేరని పోలీసులు తెలిపారు. అలాగే ఆమె చరవాణులు సైతం అందుబాటులో లేవని, ఆచూకీని గుర్తించేందుకు ప్రయత్నిస్తున్నామన్నారు. మరోవైపు సౌమ్యజాను ఓ టీవీ ఛానెల్‌కు ఇచ్చిన ఇంటర్వ్యూలో తాను అత్యవసర వైద్యసహాయం నిమిత్తం రాంగ్‌రూట్‌లో వెళ్లానని, పోలీసులు క్షమించాలని కోరారు. విధుల్లో ఉన్న పోలీసులు అసభ్యంగా దూషించడం వల్ల తాను స్పందించాల్సి వచ్చిందన్నారు. అతడిపై దాడి చేయలేదని, పోలీసులు విచారణకు పిలవలేదన్నారు.