భర్త ఇంటి ముందు భార్య ఆందోళన

పావని

కర్మన్‌ఘాట్, న్యూస్‌టుడే: భర్త ఇంటి ముందు భార్య ఆందోళనకు దిగిన ఘటన హస్తినాపురం డివిజన్‌ పరిధి రెడ్డి కాలనీలో చోటుచేసుకుంది. బాధిత వివాహిత పావని కథనం ప్రకారం.. మిర్యాలగూడ తుమ్మడం గ్రామానికి చెందిన కామేశ్వరి-వెంకట్రెడ్డి దంపతుల కుమార్తె పావని వివాహం 2023 మే 21న ఆర్టీసీ యూనియన్‌ నేత హస్తినాపురం డివిజన్‌ రెడ్డి కాలనీ వాసి రాజిరెడ్డి కుమారుడు కార్తిక్‌ రెడ్డితో జరిగింది. పెళ్లైన నాటి నుంచే భర్త భార్యను సరిగా చూసుకోవడం లేదు. అదనపు కట్నం కోసం వేధింపులకు దిగాడు. కుల పెద్దల సమక్షంలో మాట్లాడినా.. సమస్య పరిష్కారం కాలేదు. తనకు న్యాయం చేయాలని కోరుతూ కుటుంబ సభ్యులతో కలిసి యువతి.. మూడు రోజులుగా రాజిరెడ్డి నివాసం వద్ద ఆందోళన చేస్తోంది. కుల పెద్దలు, మధ్యవర్తుల సూచనతో ఆదివారం ఆందోళన విరమించింది. ఈ సందర్భంగా పావని మాట్లాడుతూ.. తనకు న్యాయం జరగకపోతే, మళ్లీ ఆందోళనకు దిగుతానన్నారు. ఆర్టీసీ యూనియన్‌ ప్రతినిధి రాజిరెడ్డి మాట్లాడుతూ.. చర్చించుకుని సమస్యను పరిష్కరించుకుంటామని తెలిపారు.