మూడో అంతస్తు నుంచి దూకి యువకుడి ఆత్మహత్య

ఆసుపత్రి భవనం పైనుంచి దూకుతూ..

నాగోలు, న్యూస్‌టుడే: మూడో అంతస్తు నుంచి దూకి ఓ యువకుడు ఆత్మహత్యకు పాల్పడ్డాడు. వనస్థలిపురం ఎఫ్‌సీఐ కాలనీలో నివసించే గుమ్మడి రితేశ్‌రెడ్డి (28) వ్యాపారి. ఏడు నెలల క్రితం వివాహమైంది. మంగళవారం ఉదయం ఉదయం 11.45 గంటల సమయంలో దిల్‌సుఖ్‌నగర్‌ నుంచి ఎల్బీనగర్‌ వైపు కారులో వేగంగా వచ్చాడు. ఎన్టీఆర్‌ నగర్‌ కమాన్‌ సమీపంలోని హనుమాన్‌ ఆలయం వద్ద కారు ఆపి శ్రీఆద్య ఆసుపత్రిలోకి వేగంగా వెళ్లాడు. భద్రతా సిబ్బంది వారించబోగా రోగి వద్దకని చెప్పాడు. మూడో అంతస్తులో ఖాళీగా ఉన్న ఓ గది కిటికీ నుంచి దూకాడు. నేలపై పడటంతో తలకు తీవ్ర గాయమైంది. ఆసుపత్రి సిబ్బంది చికిత్స చేసినా ప్రాణాలు నిలవలేదు. ఓ వ్యక్తి ద్విచక్ర వాహనంపై కారును వెంబడించాడని స్థానికులు తెలిపారు. అతని కోసం పోలీసులు గాలిస్తున్నారు.