‘బీఎండబ్ల్యూ’కు జరిమానా

ఈనాడు, హైదరాబాద్‌: రక్షణ ప్రమాణాలు పాటించకుండా తయారు చేసిన వాహనాలు అంటగట్టిన బీఎండబ్ల్యూ ఇండియా ప్రయివేటు లిమిటెడ్‌కు హైదరాబాద్‌ వినియోగదారుల కమిషన్‌-1 జరిమానా విధించింది. ఫిర్యాదీకి రూ.1,00,000 పరిహారం, కేసు ఖర్చులు రూ.25 వేలు ఇవ్వాలని ఆదేశించింది. యూసుఫ్‌గూడకు చెందిన సైబర్‌హ్యాట్‌ సొల్యూషన్స్‌ ప్రయివేటు లిమిటెడ్‌ సీఈవో శ్రీరామ్‌ సింహతేజ బీఎండబ్ల్యూ వాహనాల రక్షణ ప్రమాణాలపై ఆ సంస్థ వెబ్‌సైట్‌లో పరిశీలించి ‘బీఎండబ్ల్యూ 3 సిరీస్‌ కారును కొనుగోలు చేశారు. 2022 మార్చి 3న తమిళనాడులోని తంజావూరు తాలూకాలో కారు ప్రమాదానికి గురైంది. ఈ ఘటనలో ఎయిర్‌బ్యాగ్‌లు తెరుచుకోకపోవడం, విండ్‌షీల్డ్స్‌ పగిలిపోయి ఆ గాజుముక్కలు ముందు ఇద్దరు ప్రయాణికులకు గుచ్చుకున్నాయి. వారు తీవ్రంగా గాయపడ్డారు.  విచారణలో భాగంగా కారులో ఎయిర్‌బ్యాగులు అమర్చలేదని పోలీసులు గుర్తించారు. ఆగ్రహం వ్యక్తం చేసిన ఫిర్యాదీ సదరు సంస్థకు లేఖ రాశారు. దీనిపై బీఎండబ్ల్యూ తయారీదారులు సరైన వివరణ ఇవ్వకపోవడంతో ఫిర్యాదీ వినియోగదారుల కమిషన్‌ను ఆశ్రయించారు.