ఓలా క్యాబ్స్‌కు మొట్టికాయలు

ఈనాడు, హైదరాబాద్‌: ప్రయాణికులతో దురుసుగా ప్రవర్తించిన డ్రైవర్‌పై చర్యలు తీసుకోకపోవడంతోపాటు ఇష్టానుసారం ఛార్జీలు వసూలు చేసిన ‘ఓలా క్యాబ్స్‌’కు హైదరాబాద్‌ వినియోగదారుల కమిషన్‌-3 మొట్టికాయలు వేసింది. అనైతిక వ్యాపారానికి పాల్పడినందుకు రూ.లక్ష జరిమానా, రూ.5 వేలు కేసు ఖర్చులు చెల్లించాలని ఆదేశించింది. ప్రయాణికుల నుంచి వసూలు చేసిన రూ.861కి  12 శాతం వడ్డీ కలిపి మొత్తం డబ్బును 45 రోజుల్లో ఇవ్వాలంది. అబిడ్స్‌కు చెందిన జాబేజ్‌ సామ్యూల్‌ కొన్నేళ్లుగా ప్రతివాద సంస్థ యాప్‌ను వినియోగిస్తున్నారు. నిరంతరం తిరిగే ప్రయాణికుడు కావడంతో క్రెడిట్‌ లిమిట్‌, పే లెటర్‌ సదుపాయాన్ని కల్పించారు. ఫిర్యాదీ, తన భార్య, సహాయకురాలు కలిసి 2021 అక్టోబర్‌ 19న క్యాబ్‌ బుక్‌ చేశారు. కారులో శుభ్రత పాటించలేదు.దుర్గంధం వస్తుండడంతో ఏసీ వేయాలని కోరారు. డ్రైవర్‌ దురుసుగా ప్రవర్తించి దింపేశాడు.అప్పటికే 5కి.మీ.ప్రయాణించగా రూ.861 బిల్లు వచ్చింది. అవాక్కయిన ఫిర్యాదీ కస్టమర్‌ కేర్‌ను సంప్రదించినా లాభం లేకపోయింది. దీంతో వినియోగదారుల కమిషన్‌ను ఆశ్రయించారు.