ఎండలో తిరుగుతున్నారా.. జాగ్రత్త!

క్రమంగా ఎండలు పెరుగుతున్నాయి. పగలు ఎండ వేడి తీవ్రమైన నేపథ్యంలో దాని తీవ్రత నుంచి రక్షించుకునేందుకు తగిన జాగ్రత్తలు పాటించాలని గాంధీ ఆసుపత్రి సూపరింటెండెంట్‌ ఎం.రాజారావు సూచించారు. ఈ మేరకు ప్రజలకు అవగాహన కలిగించేందుకు పలు కార్యక్రమాలను చేపడుతున్నారు.

న్యూస్‌టుడే, గాంధీ ఆసుపత్రి

 చేయాల్సినవి

• ఎండదెబ్బ తగలకుండా టోపీ, గొడుగు, టవల్‌ ఉపయోగించాలి.
• కాటన్‌ దుస్తులు ధరించాలి. ఎండ ఎక్కువగా ఉన్న సమయంలో బయటకు వెళ్లకూడదు.
• తేలికపాటి ఆహారం తినాలి. ప్రయాణంలో తాగునీరు వెంట తీసుకెళ్లాలి.
• తరచూ నిమ్మరసం, మజ్జిగ, పండ్ల రసాలు తీసుకోవాలి.
• చెవుల్లోకి వేడిగాలి వెళ్లకుండా జాగ్రత్త పడాలి.
• ఎండదెబ్బకు గురైనవారు ఓఆర్‌ఎస్‌ లేకుంటే, ఒక లీటరు నీటిలో చిటికెడు ఉప్పు, చారెడు పంచదారను కలిపి తాగాలి (తాగించాలి).
• ఎండదెబ్బ తగిలినవారిని వీలైనంత త్వరగా ఆసుపత్రికి తీసుకెళ్లాలి. అత్యవసర పరిస్థితిలో వైద్యులను సంప్రదించాలి.

చేయకూడనివి

• మధ్యాహ్నం 12 గంటల నుంచి 3 గంటల వరకు బయటకు వెళ్లకూడదు.
• నల్లటి దుస్తులు వేసుకోవద్దు. మద్యం, టీ, కాఫీ, శీతల పానీయాలు తాగకూడదు.
• మాంసాహారం, నిల్వ ఉన్న ఆహారం తినకూడదు.
• చిన్నపిల్లలు, గర్భిణులు, వృద్ధులు ఎండలోకి వెళ్లకూడదు.
• గుండె జబ్బులు, షుగర్‌, బీపీ ఉన్నవారు ఎండలో తిరగకూడదు.
• దాహం వేసినప్పుడు కూల్‌డ్రింక్స్‌ తాగకూడదు. సొంత వైద్యం చేయకూడదు.