రాజన్న క్షేత్రానికి భక్తుల తాకిడి

స్వామివారికి మొక్కుతున్న భక్తులు 

వేములవాడ, న్యూస్‌టుడే: ప్రసిద్ధ పుణ్యక్షేత్రమైన వేములవాడలోని శ్రీ రాజరాజేశ్వరస్వామివారి క్షేత్రానికి శనివారం భక్తుల తాకిడి నెలకొంది. రాష్ట్రంలోని వివిధ ప్రాంతాలతో పాటు ఇతర రాష్ట్రాల నుంచి భక్తులు స్వామివారి దర్శనానికి తరలి వచ్చారు. దీంతో ఆలయ ప్రాంగణం, పరిసరాలు, కల్యాణకట్ట, ఆలయ ధర్మగుండం, క్యూలైన్లు రద్దీగా మారాయి. కల్యాణ కట్టలో తలనీలాలు సమర్పించుకున్న అనంతరం ధర్మగుండంలో పుణ్యస్నానాలు ఆచరించి స్వామివారిని దర్శించుకున్నారు. స్వామివారికి ప్రీతిపాత్రమైన కోడె మొక్కులను కుటుంబ సమేతంగా చెల్లించుకున్నారు. పరివార దేవతలను దర్శించుకొని తరించారు. పలువురు భక్తులు స్వామివారికి అభిషేకం, అన్నపూజ, కుంకుమ పూజ, సత్యనారాయణ వ్రతాలు, కల్యాణాలు వంటి పూజా కార్యక్రమాలు జరిపించి స్వామివారికి మొక్కులు తీర్చుకున్నారు. గండాలు తొలగాలని గండా దీపంలో నూనె పోసి మొక్కులు చెల్లించుకున్నారు. భక్తులకు ఇబ్బందులు కలుగకుండా ఆలయ అధికారులు, సిబ్బంది పర్యవేక్షణ చేశారు. దాదాపు 20 వేలకు పైగా భక్తులు స్వామివారిని దర్శించుకున్నారు.