ముగ్గురు ఉపాధ్యాయుల సస్పెన్షన్‌

కరీంనగర్‌ విద్యావిభాగం, న్యూస్‌టుడే: చిగురుమామిడి మండలం నవాబుపేట, సైదాపూర్‌ మండలంలోని తండా ప్రాథమిక పాఠశాలల్లో ఇతరులు నివసిస్తున్న విషయం ఉన్నతాధికారుల దృష్టికి వెళ్లడంతో ఆ పాఠశాలల్లోని ఎస్జీటీలు ఎ.మంగ, బి.సునీతను సస్పెండ్‌ చేసినట్లు డీఈవో జనార్దన్‌రావు శనివారం ఒక ప్రకటనలో తెలిపారు. ఈ రెండు మండలాల ఎంఈవోలకు షోకాజు నోటీసులు జారీ చేసినట్లు చెప్పారు. కరీంనగర్‌లోని ఫకీర్‌నగర్‌ ప్రాథమికోన్నత పాఠశాలలో ఎస్జీటీగా పని చేస్తున్న ఎన్‌.మంజుల చాలా రోజులుగా గైర్హాజరు కావడంతో సస్పెండ్‌ చేసినట్లు పేర్కొన్నారు. ఈ పాఠశాల కాంప్లెక్స్‌ ప్రధానోపాధ్యాయుడు, కరీంనగర్‌ ఎంఈవోలను దీనిపై వివరణ కోరినట్లు చెప్పారు.

గుర్తింపు పొందిన పాఠశాలల్లో చదివించాలి

కరీంనగర్‌ విద్యావిభాగం : ప్రభుత్వ పాఠశాలలతోపాటు గుర్తింపు పొందిన జిల్లాలోని ప్రైవేటు పాఠశాలల్లో మాత్రమే తల్లిదండ్రులు తమ పిల్లలను చదివించాలని డీఈవో జనార్దన్‌రావు ఒక ప్రకటనలో తెలిపారు. గుర్తింపు లేని పాఠశాలల్లో చదివిస్తే ఏమైనా సమస్యలు తలెత్తితే జిల్లా విద్యా శాఖ బాధ్యత వహించదన్నారు.