రేణుక ఎల్లమ్మ ఆలయంలో చోరీ

ఇల్లందకుంట, న్యూస్‌టుడే; ఇల్లందకుంట మండలం సిరిసేడు గ్రామంలోని రేణుక ఎల్లమ్మ తల్లి ఆలయంలో బుధవారం అర్ధరాత్రి చోరీ జరిగినట్లు పోలీసులు తెలిపారు. పోలీసులు, స్థానికుల కథనం ప్రకారం గురువారం ఉదయం గీతా కార్మికులు ఎల్లమ్మ ఆలయం వద్దకు వెళ్లేసరికి తలుపులు పగలగొట్టి ఉన్నాయి. లోపలికి వెళ్లి చూడగా.. అమ్మవారి హుండీ, ముక్కు పుడకా, మెడలోని హారం గుర్తుతెలియని వ్యక్తులు ఎత్తుకెళ్లినట్లు గుర్తించారు. హుండీతో కలిపి వాటి విలువ రూ.30 వేలు ఉంటుదన్నారు. మండల గౌడ సంఘం అధ్యక్షుడు మహేష్‌ ఫిర్యాదు మేరకు కేసు నమోదు చేసుకొని దర్యాప్తు చేస్తున్నట్లు పోలీసులు తెలిపారు.