అక్రమ రిజిస్ట్రేషన్లకు పాల్పడిన ముగ్గురి అరెస్ట్‌

తిమ్మాపూర్‌, న్యూస్‌టుడే : అక్రమ రిజిస్ట్రేషన్లు చేయడమే కాకుండా కొనుగోలుదారుడిని చంపుతామంటూ భయభ్రాంతులకు గురి చేసిన ముగ్గురిని అరెస్ట్‌ చేసినట్లు తిమ్మాపూర్‌ సీˆఐ స్వామి, ఎల్‌ఎండీ ఎస్సై చేరాలు తెలిపారు. వారి కథనం ప్రకారం.. కరీంనగర్‌ జిల్లా తిమ్మాపూర్‌ మండలం ఇందిరానగర్‌  గ్రామంలో సర్వే నంబర్‌ 752//బి లో నాలుగు ప్లాట్ల స్థలం 600ల చదరపు గజాలు కరీంనగర్‌ కార్ఖానా గడ్డకు చెందిన నజీర్‌ అహ్మద్‌ ఖాన్‌, ఆయన జీపీఏ అయిన మహమ్మద్‌ సిరాజుద్దీన్‌ల పేరిట ఉందని, తిమ్మాపూర్‌కు చెందిన శ్రీరామోజు శ్రీనివాస్‌ కరీంనగర్‌కు చెందిన రంగు వెంకటాచారిని నమ్మించారు. దీంతో వెంకటాచారి 2012లో ఆ భూమిని రూ.10,95,000లకు కొనుగోలు చేశారు. 2022లో మోకా మీదకు వెళ్లిన వెంకటాచారికి ఆ భూమిని 2008లోనే నజీర్‌ అహ్మద్‌ వేరే వ్యక్తికి అమ్మారని, ఆయన మరో వ్యక్తికి అమ్మేసినట్లు తెలిసింది. దీంతో తనను మోసం చేసి డబుల్‌ రిజ్రిస్టేషన్‌ చేశారని గుర్తించిన రంగు వెంకటాచారి వెంటనే వారిని నిలదీసినా లాభం లేకపోయింది. గట్టిగా నిలదీస్తే చంపుతామని బెదిరించడంతో ఊరుకున్నారు. తనకు, తన కుటుంబానికి ఆ ముగ్గురి నుంచి ప్రాణహాని ఉందని గత నెల 24న ఎల్‌ఎండీ ఠాణాలో వెంకటాచారి ఫిర్యాదు చేశారు. విచారణలో వాస్తవాలు గుర్తించి నజీర్‌ అహ్మద్‌ ఖాన్‌, మహమ్మద్‌ సిరాజుద్దీన్‌, శ్రీరామోజు శ్రీనివాస్‌లను గురువారం అరెస్ట్‌ చేసి రిమాండ్‌కు తరలించినట్లు  సీఐ, ఎస్సై తెలిపారు.