logo

కట్టుకున్న వాడే కుట్ర.. ‘కాల్‌ గర్ల్స్‌ కావాలా?’ పేరుతో ప్రకటన సృష్టించి..

‘హలో.. రేటెంత?’ అంటూ అటు వైపు నుంచి వరుసగా ఫోన్లు మోతెక్కుతుంటే ఆమెకు నోటి మాట రావడం లేదు. ఆమె సోదరులకూ ఆగంతకులు ఫోన్లు చేసి ‘అమ్మాయి.. ఉందా?’ అంటూ ప్రశ్నిస్తుంటే ఆందోళనకు గురై.. చివరికి పోలీస్‌ ఠాణాకు పరుగులు తీసి సాయం అర్థించారు.

Updated : 12 Apr 2024 14:21 IST

బెంగళూరు (యశ్వంతపుర), న్యూస్‌టుడే : ‘హలో.. రేటెంత?’ అంటూ అటు వైపు నుంచి వరుసగా ఫోన్లు మోతెక్కుతుంటే ఆమెకు నోటి మాట రావడం లేదు. ఆమె సోదరులకూ ఆగంతకులు ఫోన్లు చేసి ‘అమ్మాయి.. ఉందా?’ అంటూ ప్రశ్నిస్తుంటే ఆందోళనకు గురై.. చివరికి పోలీస్‌ ఠాణాకు పరుగులు తీసి సాయం అర్థించారు. అధికారులు ఆ ఫోన్ల వ్యవహారంపై తీగలాగితే దిగ్భ్రాంతికర వాస్తవాలు వెలుగులోకి వచ్చాయి. ఆ వివరాల సాయంతో.. సామాజిక మాధ్యమాల ద్వారా తనను వేధింపులకు గురి చేస్తున్నట్లు భర్తపైనే ఆ భార్య బెంగళూరు నందినిలేఔట్‌ పోలీసు ఠాణాలో ఫిర్యాదు చేశారు.

పోలీసులు అందించిన వివరాల్లోకి వెళితే.. ఆ భార్యాభర్తలిద్దరికీ కొన్నాళ్లుగా సరిపోవడం లేదు. భర్త నుంచి విడాకుల కోసం ఆమె న్యాయస్థానంలో పిటిషన్‌ దాఖలు చేశారు. ఆ కోపంతో భర్త ఓ కుట్ర పన్నాడు. ఫేస్‌బుక్‌లో ఆమెతో పాటు ఆమె కుటుంబ సభ్యుల ఫోన్‌నెంబర్లు పొందుపరచి, ‘కాల్‌ గర్ల్స్‌ కావాలా?’ అంటూ ప్రకటన సృష్టించి, విదేశాలకు వెళ్లిపోయాడు. దాన్ని చూసిన అనేక మంది వారికి ఫోన్లు చేయడం మొదలుపెట్టారు. ఫేస్‌బుక్‌లో ఓ పేజ్‌ సృష్టించి, వారిని సతాయించినట్లు పోలీసులు వివరించారు. బాధితురాలు ఆ వ్యక్తిని 2019లో పెళ్లి చేసుకున్నారు. అప్పటి నుంచి శారీరక, మానసిక, చిత్రహింసలకు గురి చేస్తున్నాడనే వాటిని తట్టుకోలేక విడాకులు తీసుకోవాలని నిర్ణయించుకున్నారు. ఆ క్రమంలోనే నిందితుడు సామాజిక మాధ్యమ వేదికగా కొత్త కుట్రలకు తెరలేపడంతో పోలీసులు మరిన్ని సెక్షన్ల కింద కేసులు నమోదు చేసి, అరెస్టుకు రంగం సిద్ధం చేశారు.

Tags :

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.

మరిన్ని

ap-districts
ts-districts

సుఖీభవ

చదువు