Rave Party: రేవ్‌పార్టీ వ్యవహారంలో నిర్లక్ష్యం.. ముగ్గురు పోలీసులపై వేటు

బెంగళూరు (యశ్వంతపుర), న్యూస్‌టుడే : నగర శివార్లలో ఇటీవల నిర్వహించిన రేవ్‌పార్టీ వ్యవహారం పోలీస్‌ శాఖలోనూ కలకలం రేపుతోంది. రేవ్‌ పార్టీ కొనసాగుతున్నా కనీస సమాచారాన్ని సేకరించలేక పోయారంటూ హెబ్బగూడి పోలీసుఠాణా ఏఎస్‌ఐతో పాటు ముగ్గురిని బెంగళూరు గ్రామీణ జిల్లా ఎస్పీ మల్లికార్జున బాలదండి సస్పెండ్‌ చేశారు. గూఢచారి విభాగం కానిస్టేబుల్‌ ఎస్‌బీ గిరీశ్, ఏఎస్‌ఐ నారాయణస్వామి, ఆ ప్రాంత గస్తీ కానిస్టేబుల్‌ దేవరాజును సస్పెండ్‌ చేశారు. ఆ ప్రాంత సీఐ, డీఎస్పీలకూ తాఖీదులు జారీ చేశారు. రేవ్‌పార్టీ సమాచారాన్ని స్థానిక పోలీసులు పట్టించుకోలేదని, సీసీబీ విభాగం రంగంలోకి దిగాల్సిన పరిస్థితి ఎందుకు వచ్చిందని ఎస్పీ నిలదీశారు. అర్ధరాత్రి వేళ సీసీబీ పోలీసులు దాడి చేసిన విషయం మరుసటి రోజు ఉదయం కూడా స్థానిక పోలీసులు గుర్తించలేదని ఆయన తీవ్ర అసంతృప్తి వ్యక్తం చేశారు.