సువర్ణకాంతుల సౌధ

బెళగావి, న్యూస్‌టుడే : బెళగావి సువర్ణ సౌధకు శాశ్వత ప్రాతిపదికన విద్యుత్తు దీపాల వెలుగులను ప్రభుత్వం అందుబాటులోకి తీసుకు వచ్చింది. బెంగళూరులోని విధానసౌధ వద్ద ఆదివారం, సెలవు రోజులు, ప్రత్యేక దినోత్సవాలకు రంగుల వెలుగులు పడేలా ప్రభుత్వం రెండున్నర దశాబ్దాల కిందట చర్యలు తీసుకుంది. సువర్ణ సౌధ వద్ద ఇదే తరహా ఏర్పాటు చేయాలని వచ్చిన ప్రతిపాదనను పరిగణనలోకి తీసుకుని ఈ సదుపాయాన్ని అందుబాటులోకి తీసుకువచ్చామని మంత్రి లక్ష్మీ హెబ్బాళ్కర్‌ తెలిపారు. శీతాకాల సమావేశాలు, ఆదివారం, సెలవు రోజుల్లో ఈ రంగుల దీపాలను వెలిగించేందుకు ఆదేశాలు ఇచ్చామన్నారు. సందర్శకులు ఇక్కడకు వచ్చి ఫొటోలు తీసుకునేందుకు అవకాశం కల్పిస్తామని తెలిపారు.