అర్హులందరికీ రేషన్‌ కార్డులు: పొంగులేటి

నేలకొండపల్లి, న్యూస్‌టుడే: రాష్ట్రంలో అర్హులందరికీ రేషన్‌ కార్డులు, పక్కా ఇళ్లు మంజూరు చేస్తామని మంత్రి పొంగులేటి శ్రీనివాసరెడ్డి తెలిపారు. సంక్షేమ పథకాల అమలు, ఆరు గ్యారంటీల విషయంలో రాజీపడబోమని స్పష్టం చేశారు. గువ్వలగూడెం, ముజ్జుగూడెం, అనాసాగరం, సదాశివపురం, పాత కొత్తూరు, నాచేపల్లిలో సోమవారం పర్యటించారు. స్థానికులతో మాట్లాడి సమస్యలు తెలుసుకున్నారు. లోక్‌సభ ఎన్నికల ప్రక్రియ ముగియగానే పనులన్నీ పూర్తి చేయిస్తామని హామీ ఇచ్చారు. నియోజకవర్గంలో నీటి ఎద్దడి నివారణకు యుద్ధ ప్రాతిపదికన చర్యలు చేపడతామన్నారు. మూడేళ్లలో పాలేరు నియోజకవర్గంలో పేదలందరికీ ఇందిరమ్మ పక్కా గృహాలుండాలన్నదే తన లక్ష్యమన్నారు. మాజీ ఎమ్మెల్సీ బాలసాని లక్ష్మీనారాయణ, గిడ్డంగుల సంస్థ ఛైర్మన్‌ రాయల నాగేశ్వరరావు, శాఖమూరి రమేశ్, నెల్లూరి భద్రయ్య, చెరువు స్వర్ణ, బచ్చలకూరి నాగరాజు, కడియాల నరేశ్‌ పాల్గొన్నారు. 

ఖమ్మం కమాన్‌బజార్‌: డీసీసీ మాజీ అధ్యక్షుడు బానోతు సోమ్లానాయక్‌ అనారోగ్యంతో హైదరాబాద్‌లోని ఓ ఆస్పత్రిలో చికిత్స పొందుతున్నారు. ఆయనను మంత్రి పొంగులేటి శ్రీనివాసరెడ్డి సోమవారం పరామర్శించారు.