రామాలయం భూముల రక్షణపై సమీక్ష

భద్రాచలం, న్యూస్‌టుడే: భద్రాచలం శ్రీసీతారామచంద్రస్వామి వారికి ఉన్న భూముల వివరాలపై హైదరాబాద్‌లో మంగళవారం దేవాదాయ శాఖామంత్రి కొండా సురేఖ, ఆశాఖ ప్రిన్సిపల్‌ సెక్రటరీ శైలజా రామయ్యర్, కమిషనర్‌ హనుమంతరావు సమీక్షించారు. క్షేత్ర స్థాయి పరిస్థితులను ఈఓ రమాదేవిని అడిగి తెలుసుకున్నారు. రెండు తెలుగు రాష్ట్రాలలో సుమారు 1,300 ఎకరాల భూమి రామాలయానికి ఉండగా.. ఇందులో ఎక్కువ భాగం ఆక్రమణలో ఉంది. అల్లూరి సీతారామరాజు జిల్లా ఎటపాక మండలం పురుషోత్తపట్నం గ్రామంలో దేవుడి భూముల పరిస్థితిపై చర్చించారు. అక్కడి ఆక్రమణలను చట్టపరంగా తొలగించాలని నిర్ణయించారు. దేవుడి పేరిట ఉన్న ప్రతి అంగుళం జాగాను కంప్యూటరీకరించే అంశంపై సమీక్షించారు. ఆలయంలో చేపట్టిన అభివృద్ధి పనుల ప్రగతితోపాటు, చేయాల్సిన వాటిపైనా చర్చలు సాగాయి. మాస్టర్‌ ప్లాన్‌పై మరో దఫా సమీక్ష నిర్వహించనున్నారు.