వర్జీనియా రైతులను ఆదుకుంటాం

అశ్వారావుపేట, న్యూస్‌టుడే: తుపాను ప్రభావానికి గురైన వర్జీనియా పొగాకు రైతులను అన్ని విధాలా ఆదుకుంటామని టొబాకో బోర్డు ఛైర్మన్‌ యశ్వంత్‌ హామీ ఇచ్చారు. అశ్వారావుపేట, పాపిడిగూడెంతోపాటు సరిహద్దు ప్రాంతాలైన ఏపీలోని జీలుగుమిల్లి, తాటాకులగూడెం, కామయ్యపాలెం, రాసన్నగూడెం ప్రాంతాల్లో భారీ వర్షం, వరదలకు దెబ్బతిన్న వర్జీనియా పొగాకు తోటలను పరిశీలించారు. జంగారెడ్డిగూడెం వేలం కేంద్రం పరిధిలో సుమారు 5,000 హెక్టార్లలో వర్జీనియా పొగాకు తోటలకు నష్టం వాటిల్లిందని రైతుసంఘ నాయకులు తెలిపారు. పూర్తిగా దెబ్బతిన్న తోటలకు రూ.లక్ష, పాక్షికంగా దెబ్బతిన్న వాటికి రూ.50వేలు సాయం అందించాలని విజ్ఞప్తి చేశారు. ఆర్‌ఎం ఆదర్శయ, జంగారెడ్డిగూడెం సూపరింటిండెంట్‌ జై సురేంద్ర, క్షేత్ర అధికారులు జేసీ ప్రభాకరరెడ్డి, బాలాజీ, వెంకయ్య, రైతుసంఘ నాయకులు సత్రం వెంకట్రావు, గడ్డమణుగు సత్యనారాయణ, రెడ్డిబాబు, వేముల ప్రకాశరావు, సుంకవల్లి వీరభద్రరావు ఉన్నారు.