దోశలో ప్లాస్టిక్‌ వైర్‌

హోటల్లో వాగ్వాదం

 ఇల్లెందు రోడ్డులోని ఓ ప్రముఖ హోటల్లో అందించిన దోశలో ప్లాస్టిక్‌ వైర్‌

ఖమ్మం కార్పొరేషన్‌, న్యూస్‌టుడే: ఖమ్మం నగరంలోని ఇల్లెందు రోడ్డులోని ఓ ప్రముఖ హోటల్లో వండిన దోశలో ప్లాస్టిక్‌ వైరు రావడంతో వాగ్వాదం జరిగిన సంఘటన బుధవారం చోటుచేసుకుంది. నగరానికి చెందిన ఓ హోటల్లో టిఫిన్‌ చేసేందుకు వెళ్లి దోశ తేవాలని సూచించారు. సగం తిన్న అనంతరం మధ్యలో ప్లాస్టిక్‌ వైరు రావడంతో కంగు తిన్నారు. దీంతో హోటల్‌ యజమాని వద్దకు వెళ్లి ప్రశ్నించడంతో వారి మధ్య కొద్దిసేపు వాగ్వాదం చోటు చేసుకుంది. దీంతో బాధితుడు ఆహార తనిఖీ అధికారికి కిరణ్‌కు ఫిర్యాదు చేశారు. ఆయన అందుబాటులో లేకపోవడంతో గురువారం పరిశీలించి తగిన చర్యలు తీసుకుంటామని తెలపడంతోపాటు, నగరపాలక సంస్థ ఆధ్వర్యంలో జరిమానా విధించాలని నిర్ణయించారు.