సామర్యాథ్యనికి తగ్గట్టు.. లక్ష్యం చేరేట్టు!

కొత్తగూడెం సింగరేణి, న్యూస్‌టుడే

సింగరేణి సంస్థ 2024-25 ఆర్థిక సంవత్సరం ఉత్పత్తి లక్ష్యాన్ని నిర్దేశించుకుంది. కొత్తగా అందుబాటులోకి రానున్న గనులను దృష్టిలో ఉంచుకొని గతేడాది లక్ష్యం కన్నా 2 మిలియన్‌ టన్నుల బొగ్గును అదనంగా ఉత్పత్తి చేయాలని నిర్ణయించింది. వీటిలో ప్రధానంగా నైనీ కోల్‌బ్లాకు, వీకే ఉపరితలగని ఉన్నాయి. ఇవి 2023-24 ఆర్థిక సంవత్సరంలోనే ప్రారంభం కావాల్సి ఉండగా అనివార్య కారణాల (ఫేజ్‌-1 అనుమతులు రాకపోవటం)తో జాప్యం జరిగింది.

కమిటీ సందర్శించాకే..

కొత్త ఉత్పత్తి లక్ష్యాలను నిర్ణయించేందుకు కార్పొరేట్ కార్యాలయంలోని అధికారులతో నాలుగు నెలల క్రితమే ‘టార్గెట్ కమిటీ’ ఏర్పాటైంది. ఈ కమిటీ అన్ని గనులు, ఏరియాలను సందర్శించి అక్కడి అధికారులతో సమీక్షించింది. గనుల సామర్థ్యాన్ని బట్టి ఉత్పత్తి లక్ష్ల్యాలను నిర్దేశించింది. కొన్ని ఏరియాలకు ఉత్పత్తి లక్ష్యాలను పెంచగా మరికొన్నింటికి తగ్గించింది.

అధికారులు, కార్మికుల సహకారంతో 2023-24 ఆర్థిక సంవత్సరం ఉత్పత్తి లక్ష్యాన్ని సాధించగలిగాం. ఇదే స్ఫూర్తిని కొనసాగించి ప్రభుత్వ సంస్థను కాపాడుకోవాల్సిన బాధ్యత అందరిపై ఉంది. లాభాల బాటలో సింగరేణిని నడిపిద్దాం.

 ఎన్‌.బలరాం, సింగరేణి సీఎండీ