రాజీనామా చేయాలంటూ వాలంటీర్లపై ఒత్తిళ్లు

వాలంటీర్లతో సమావేశమైన కౌన్సిలర్‌ కలాం (సెల్‌ చూస్తున్న వ్యక్తి)

నంద్యాల పురపాలకం, న్యూస్‌టుడే : నంద్యాల పట్టణంలోని 7వ వార్డు సచివాలయం పరిధిలోని వాలంటీర్లంతా రాజీనామా చేయాలంటూ స్థానిక కౌన్సిలర్‌ షేక్‌ అబ్దుల్‌కలాం బాషా ఒత్తిడి చేస్తున్నట్లు సమాచారం. ఈ వార్డులో 29 మంది వాలంటీర్లు ఉండేవారు. ఈనెల 10న సచివాలయం పైన ఉన్న తన గదిలో ఆయన వాలంటీర్లతో సమావేశం నిర్వహించి 17 మందితో రాజీనామా చేయించారు. మరో 12 మంది రాజీనామా చేయలేదు. వారికి శిల్పా 7వ వార్డు (అబ్దుల్‌ కలాం) అనే వాట్సప్‌ గ్రూప్‌ ద్వారా ఉదయం 10.30 గంటలకు సచివాలయం పైన ఉన్న తన కార్యాలయానికి తప్పకుండా రావాలని శనివారం సందేశం పంపారు.