నృసింహస్వామి జయంతి బ్రహ్మోత్సవాలు

స్వామి వారి ఉత్సవంలో భక్తులు  

అహోబిలం (ఆళ్లగడ్డ గ్రామీణం), న్యూస్‌టుడే: వైశాఖ మాస నృసింహ జయంతి బ్రహ్మోత్సవాల్లో నరహరుడు అహోబిలం లక్ష్మీనృసింహస్వామి వేణుగోపాల స్వామి అలంకరణలో శనివారం భక్తులకు దర్శనమిచ్చారు. అనంతరం స్వామివారు శ్రీదేవి, భూదేవి సమేతంగా పల్లకిపై కొలువుదీర్చి ఆలయ తిరువీధుల్లో మేళతాళాలతో ఊరేగించారు. మధ్యాహ్నం స్వామి, అమ్మవార్లకు పంచామృతాభిషేకం చేసి మహామంగళహారతి సమర్పించారు. సాయంత్రం జ్వాలామూర్తి పొన్న చెట్టు వాహనంపై విహరించారు. దిగువ అహోబిలంలో ఉదయం ప్రహ్లాద వరదస్వామి, శ్రీదేవి, భూదేవి అమ్మవార్లను పంచామృతాలతో అభిషేకం చేసి పల్లకిపై ఆలయ పుర వీధుల్లో ఊరేగించారు. ఆలయ ప్రధానార్చకుడు కిడాంబి వేణుగోపాలన్, మణియార్‌ సౌమ్యనారాయణన్‌ ఆధ్వర్యంలో ఉత్సవాలు నిర్వహిస్తున్నారు.