సమస్యాత్మక ప్రాంతాలపై నిఘా

కర్నూలు రేంజ్‌ డీఐజీ విజయరావు

వీడియో కాన్ఫరెన్స్‌లో కర్నూలు రేంజ్‌ డీఐజీ విజయరావు 

కర్నూలు నేరవిభాగం, న్యూస్‌టుడే: జూన్‌ 4న సార్వత్రిక ఎన్నికల ఫలితాలు వెలువడనున్న నేపథ్యంలో సమస్యాత్మక ప్రాంతాలపై నిఘా పెంచి గట్టి భద్రతా ఏర్పాట్లు చేయాలని కర్నూలు రేంజ్‌ డీఐజీ సి.హెచ్‌.విజయరావు ఆదేశించారు. బుధవారం ఆయన కర్నూలు, కడప, నంద్యాల, అన్నమయ్య జిల్లాల ఎస్పీలతో వీడియో కాన్ఫరెన్స్‌ నిర్వహించి పలు ఆదేశాలు జారీ చేశారు. ఓట్ల లెక్కింపు కేంద్రాల వద్ద పకడ్బందీ ఏర్పాట్లు చేయాలన్నారు. కమాండ్‌ కంట్రోల్‌ నుంచి సిబ్బందికి మానిటరింగ్‌ చేయాలన్నారు. కౌంటింగ్‌ కేంద్రాల వద్ద అభ్యర్థులు, ఏజెంట్లు మాత్రమే ఉండాలన్నారు. పెట్రోలు బంకుల్లో క్యాన్లు, సీసాల్లో పెట్రోలు, డీజిల్‌ విక్రయించకుండా చర్యలు చేపట్టాలన్నారు. బాణసంచా విక్రయాలు జరగకుండా చర్యలు తీసుకోవాలన్నారు. మే 30 నుంచి జిల్లా సరిహద్దులో చెక్‌పోస్టులు ఏర్పాటు చేయాలన్నారు. అదనపు ఎస్పీలు, డీఎస్పీ, సీఐలు, ఎస్సైలకు విధి నిర్వహణపై దిశా నిర్దేశం చేయాలన్నారు. సమస్యాత్మక వ్యక్తులను బైండోవర్‌ చేయాలన్నారు. రాత్రి గస్తీ పెంచాలని, పోలీసు కంట్రోల్‌ రూంలను అప్రమత్తం చేయాలన్నారు.