ఆర్యవైశ్యులంటే కులం కాదు.. కుటుంబం

మాట్లాడుతున్న మాజీ ఎంపీ టి.జి.వెంకటేశ్‌,చిత్రంలో తెదేపా నియోజకవర్గ బాధ్యుడు టి.జి.భరత్‌ తదితరులు

కర్నూలు బి.కాంపు, న్యూస్‌టుడే: ఆర్యవైశ్యులంటే కులం కాదు, కుటుంబమని, అందరూ కలిసి సమస్యలు పరిష్కరించుకోవాలని మాజీ ఎంపీ టి.జి.వెంకటేశ్‌, తెదేపా నియోజకవర్గ బాధ్యుడు టి.జి.భరత్‌ అన్నారు. కర్నూలు నగర శివారులోని గాయత్రీ గోశాలలో ఆదివారం ఆర్యవైశ్యుల ఆత్మీయ సమ్మేళనం, కార్తిక వనభోజనం నిర్వహించారు. టి.జి.వెంకటేశ్‌ మాట్లాడుతూ ఆర్యవైశ్యులందరినీ ఒక చోట చూస్తుంటే చాలా సంతోషంగా ఉందన్నారు. దేశంలో ఆర్యవైశ్యులకు ప్రత్యేకమైన గుర్తింపు ఉందన్నారు. ఆర్యవైశ్యుల నాయకత్వాన్ని బలపర్చుకోవాలన్నారు. టి.జి.భరత్‌ మాట్లాడుతూ ప్రతి ఒక్కరు తన పిల్లల్ని గోసేవ చేసేలా ప్రోత్సహించాలన్నారు. ఆర్యవైశ్యులకు గుర్తింపు రావాలంటే ఐక్యత చాలా అవసరమన్నారు. తాను గెలిస్తే కర్నూలు నగరాన్ని అభివృద్ధి చేస్తానన్నారు. అనంతరం చిన్నారులు ప్రదర్శించిన నృత్యాలు విశేషంగా అలరించాయి.