కరవు నష్టం లెక్క తేల్చారు

రూ.368.36 కోట్ల పరిహారానికి ప్రతిపాదనలు

కర్నూలు వ్యవసాయం, న్యూస్‌టుడే : జిల్లాలో 24 కరవు మండలాల్లో లెక్క తేల్చారు. వ్యవసాయ, రెవెన్యూ శాఖల అధికారులు, గ్రామస్థాయిలో వీఆర్వో, గ్రామ వ్యవసాయ సహాయకులు పంట నష్టాన్ని క్షేత్రస్థాయిలో పంటలు  గణించారు. ఆయా మండలాల్లో 2,38,231.42 హెక్టార్లలో పంటనష్టం జరిగినట్లు నిర్ధారించారు. 2,90,741 మంది రైతులకు రూ.368.36 కోట్ల పంట నష్టపరిహారం ఇవ్వాలని ప్రతిపాదనలు సిద్ధం చేశారు. జిల్లా కలెక్టర్‌ ఆమోదంతో ప్రభుత్వానికి నివేదించనున్నట్లు జిల్లా వ్యవసాయాధికారిణి పీఎల్‌ వరలక్ష్మి సోమవారం తెలిపారు. ఒక రైతుకు పంట నష్టపరిహారం గరిష్ఠంగా రెండు హెక్టార్లకే పరిమితం చేయడంతో ప్రస్తుత నివేదికల ప్రకారం పంట నష్టం తగ్గిందని వ్యవసాయశాఖ అధికారులు తెలిపారు. ప్రాథమిక నివేదికలతో పోలిస్తే 41,360 మంది రైతులకు సంబంధించి 38,483 హెక్టార్ల విస్తీర్ణం తగ్గడం గమనార్హం