తాగునీటి సమస్యకు పరిష్కారం చూపాలి

భూమా అఖిలప్రియ

భవిష్యత్తుకు గ్యారంటీ కార్యక్రమంలో భూమా అఖిలప్రియ

ఆళ్లగడ్డ, న్యూస్‌టుడే : ఆళ్లగడ్డలో తాగునీటి సమస్య పరిష్కారానికి ఎలాంటి చర్యలు తీసుకుంటారో కమిషనర్‌ తెలపాలని, లేదంటే ఆయన కార్యాలయం ఎదుట ధర్నా చేస్తామని మాజీ మంత్రి భూమా అఖిలప్రియ హెచ్చరించారు. భవిష్యత్తుకు గ్యారంటీ కార్యక్రమంలో భాగంగా శుక్రవారం ఆమె పాలసాగరం రోడ్డులో ఇంటింటి ప్రచారం చేశారు. ఆళ్లగడ్డలో నీటి సమస్య ఎదురైతే అధికార పార్టీ నాయకులు నీటి ట్యాంకర్లు ఏర్పాటు చేసి ప్రజల సొమ్ము దోచుకునేందుకు యత్నిస్తున్నారని అఖిలప్రియ ఆరోపించారు. తెదేపా ప్రభుత్వంలో చేపట్టిన ప్రాజెక్టులను ఎమ్మెల్యే పూర్తి చేయడంలో వెనుకబడ్డారని ధ్వజమెత్తారు. స్థానికంగా నిర్మించిన స్టేడియం రేకుల షెడ్డును తలపిస్తోందన్నారు. రాష్ట్రంలో కులమతాలకు అతీతంగా తెదేపా పాలన సాగించిందని పేర్కొన్నారు. కార్యక్రమంలో ఆ పార్టీ నాయకులు ప్రసాద్‌, హుస్సేన్‌ బాష, శంకరయ్య, శేఖర్‌రెడ్డి పాల్గొన్నారు.