స్థానిక సమస్యలను వెంటనే పరిష్కరించాలి

ఆదోని మార్కెట్ : ఆదోని పురపాలక సంఘం కౌన్సిల్ సమావేశంలో వివిధ సమస్యలపై సభ్యులు గట్టిగా నిలదీశారు. గురువారం ఛైర్‌పర్సన్‌ శాంత అధ్యక్షతన జరిగిన కౌన్సిల్ మీటింగ్‌లో ముందుగా 24 అంశాల ఎజెండాపై చర్చించి ఆమోదించారు. అనంతరం సభ్యులు మాట్లాడుతూ.. పట్టణంలో తాగునీటి సమస్యలు మొదలుకొని వీధి దీపాల వరకు అన్నింటి ఇబ్బందులు ఉన్న అధికారులు పట్టించుకోవడంలేదని అధికార పార్టీ సభ్యులు బాలాజీ యాదవ్, రఘునాథరెడ్డి, ఉస్మాన్ తెలిపారు. విద్యుత్ దీపాలు లేక చాలా కాలనీల్లో అంధకారం నెలకొంది అన్నారు. వేసవి కాలంలో తాగునీటి సమస్యలు ఎదురుకాకుండా ముందస్తుగా జనరేటర్లు ఏర్పాటు చేసుకోవాలని సభ్యులు సూచించారు. కుక్కల బెడద అధికమైందని రహదారులపై జనం తిరగలేకపోతున్నారని, రోజురోజుకు బాధితులు పెరుగుతున్నారని వీటి కట్టడికి చర్యలు తీసుకోవాలని గట్టిగా కోరారు. సమావేశంలో వైస్ చైర్మన్ మహమ్మద్ గౌస్, సహాయ కమిషనర్ అనుపమ, ఇన్చార్జి మున్సిపల్ ఇంజనీర్ వెంకట చలపతి, డీఈలు, ఏఈలు, వివిధ విభాగ అధికారులు పాల్గొన్నారు.