తాగునీరివ్వని ఎమ్మెల్యే మనకెందుకు?

కోసిగి, న్యూస్‌టుడే: ప్రజలకు, రైతులకు సాగు, తాగునీరివ్వని ఎమ్మెల్యే మన మంత్రాలయం నియోజకవర్గానికి అవసరమా అని తెదేపా అభ్యర్థి రాఘవేంద్రరెడ్డి అన్నారు. శుక్రవారం ఆయన తెదేపా జిల్లా ఉపాధ్యక్షుడు ముత్తురెడ్డి, పల్లెపాడు రామిరెడ్డి, చింతలగేని నర్సారెడ్డి, మండల కన్వీనర్‌ జ్ఞానేశ్‌లతో కలిసి కోసిగి మండలం జుమ్మాలదిన్నె, గౌడగల్లు, వందగల్లు, నెలకోసిగి, దుద్ది గ్రామాల్లో ప్రచారం నిర్వహించారు. ఇంటింటికి తిరిగి తెదేపా మ్యానిఫెస్టో పత్రాలు పంపిణీ చేశారు. గౌడగల్లు గ్రామంలో మాట్లాడుతూ.. ఎమ్మెల్యే బాలనాగిరెడ్డి మూడేళ్ల క్రితం సుమారు రూ.9 లక్షలతో జల్‌జీవన్‌ పథకాన్ని ప్రారంభించినా ఇంటింటికి కుళాయి నీటిని అందించలేదన్నారు. ఈ ఎన్నికల్లో తెదేపాను గెలిపించి వైకాపాను తరిమికొట్టాలన్నారు.