40 ఎకరాలకు పాకిన మంటలు

గోపాల్‌పేటలో మండుతున్న వరికొయ్యలు 

గోపాల్‌పేట, న్యూస్‌టుడే : యాసంగిలో వరి పంటను యంత్రాలతో కోయించిన కొందరు రైతులు కొయ్యలకు నిప్పంటించడం వల్ల మంటలు గాలివాటానికి సమీప పొలాలకు వ్యాపించి నష్టాన్ని కలిగిస్తున్నాయి. వరి కొయ్యలకు నిప్పంటించొద్దని వ్యవసాయాధికారుల సూచనలను కొందరు పెడచెవిన పెడుతున్నారు. వీరి చర్యలతో పశువుల పాకలు, మామిడితోటలు కాలిపోయిన సంఘటనలు ఉన్నాయి. శనివారం గోపాల్‌పేటలో వరి కొయ్యలకు ఎవరైనా కావాలని నిప్పంటించారా? లేక ప్రమాదవశాత్తు మంటలంటుకున్నాయో తెలియదు కానీ సుమారు 40 ఎకరాలకు మంటలు వ్యాపించాయి. గ్యాస్‌ గోదాం, పెట్రోలుపంపు సమీపంలో గుర్తుతెలియని వ్యక్తులు వరి కొయ్యలకు నిప్పు పెట్టారు. మంటలు 40 ఎకరాల వరకు వ్యాపించాయి. వనపర్తి నుంచి అగ్నిమాపక సిబ్బంది వచ్చి వాటిని అదుపులోకి తెచ్చేందుకు ప్రయత్నించారు. పొలంగట్లను దాటి వాహనం వెళ్లలేక పోవడంతో వాహన సిబ్బంది అందివచ్చిన వరకు మంటలను ఆర్పారు. రైతులు బోర్లనీటిని పైపుల ద్వారా తీసుకెళ్లి అదుపులోకి తీసుకొచ్చారు.