తెగ తాగారు

గోదాం నుంచి దుకాణాలకు తరలించేందుకు సిద్ధంగా ఉన్న మద్యం సీసాల కాటన్లు

వనపర్తి న్యూటౌన్, న్యూస్‌టుడే: వేసవితాపం నుంచి ఉపశమనం పొందేందుకు జిల్లాలో మందుబాబులు తెగ తాగేశారు. వేసవితో పాటు ఎన్నికల సందర్భంగా మార్చి, ఏప్రిల్, మే నెలలో మద్యం విక్రయాలు భారీగా పెరిగాయి. గతేడాది మే నెలలో రూ.1.94 కోట్లు మద్యం విక్రయాలు జరగగా.. ఈ ఏడాది మే 18వ తేదీ నాటికి రూ.1.45 కోట్లు విలువ గల మద్యం అమ్మకాలు జరిగాయి. కడుకుంట్ల లిక్కర్‌ గోదాం పరిధిలో 111 మద్యం దుకాణాలు, 20 బార్లు ఉన్నాయి. గతేడాది ఏప్రిల్‌లో రూ.1.75 కోట్లు వ్యాపారం జరగగా ఈ ఏడాది అదే నెలలో రూ.2.02 కోట్లు అమ్మకాలు జరిగాయి.

• 2023 మార్చి, ఏప్రిల్, మే నెల వరకు 3,38,850 కేసుల మద్యం, 5,46,368 బీర్ల కేసులు అమ్ముడుబోగా రూ.5.37కోట్ల మద్యం విక్రయాలు జరిగాయి. ఈ ఏడాది మార్చి నుంచి మే 16వ తేదీ వరకు 3,03,009 కేసుల మద్యం, 4,45,879 బీర్ల కేసులు అమ్ముడుబోయాయి. 
• గతేడాది ఏప్రిల్‌లో రూ.1.35 కోట్ల విలువగల 91,250 కేసుల మద్యం, 1,47,600 కేసుల బీర్లు అమ్మారు. ఈ ఏడాది ఇదే నెలలో రూ.2.02 కోట్ల విలువ గల మద్యం 1,17,284 కేసులు, 1,99,800 కేసుల బీర్లు అమ్ముడుబోయాయి. ఎన్నికల పుణ్యమా అని 26,034 కేసుల మద్యం, 52,200 కేసుల బీర్లు ఎక్కువగా అమ్ముడుబోయాయి.
• ఎన్నికల సందర్భంగా పోలీసులు గొలుసు దుకాణాలపై దాడులు చేసిన కేసులు నమోదు చేసినా గుట్టుచప్పుడు కాకుండా అమ్మకాలు కొనసాగాయి. దీంతో గతేడాదితో పోలిస్తే ఈ  ఏడాది మద్యం విక్రయాలు ఎక్కువగా జరిగాయి.