మిరప రైతుల్లో ఆందోళన

వర్ష భయంతో మిర్చిపై కవర్లు కప్పుతున్న ఎల్కూరు రైతులు

మల్దకల్‌, న్యూస్‌టుడే: ఆరుగాలం కష్టపడి పండించిన మిర్చి పంట చేతికి వచ్చిన సమయంలో తుపాన్‌తో రైతులు ఆందోళన చెందుతున్నారు. మూడు రోజుల నుంచి అడపాదడపా ఆకాశం మేఘావృతం కావడం జల్లులు పడుతుండటంతో రైతుల పరిస్థితి దయనీయంగా మారింది. ప్రస్తుతం మండలంలో బోర్లు, ర్యాలంపాడు ప్యాకేజీ కాల్వల కింద సాగు చేసిన మిర్చి పంటను కోసి రైతులు పొలాల్లోనే ఆరబెట్టుకున్నారు. వర్షానికి తడిస్తే మిర్చి రంగు, రుచి మారడంతో పాటు గిట్టుబాటు ధర రాక రైతులు తీవ్రంగా నష్టపోతారు. మంగళవారం ఉదయం నుంచి ఆకాశం మేఘావృతం కావడం చిరుజల్లులు కురియడంతో రైతులు కుప్పలుగా పోసి, పొలాల్లో ఆరబెట్టిన మిర్చిపై కవర్లు కప్పి కాపాడుకోవడానికి శ్రమపడుతున్నారు.