నిర్మించి.. వదిలేసి..

నిరుపయోగంగా రెండు పడక గదుల ఇళ్లు

చేగుంటలో పంపిణీ చేయకుండా ఉన్న నివాసాలు

న్యూస్‌టుడే, చేగుంట: చేగుంటలో రెండు పడక గదుల ఇళ్లను నిర్మించి వృథాగా వదిలేశారు. సుమారు ఐదేళ్ల క్రితం జిల్లాలోనే మొదటిసారిగా చేగుంటలో ఇళ్ల నిర్మాణానికి శ్రీకారం చుట్టారు. వీటి నిర్మాణం పూర్తిగా నత్తనడకన మూడేళ్ల పాటు సాగింది. మొత్తం 100 ఇళ్లను ఎట్టకేలకు రెండేళ్ల క్రితం పూర్తిచేశారు. వీటిని బహుళ అంతస్తులతో నిర్మాణం చేపట్టారు. ప్రధాన రోడ్డుతో పాటు వీటి చుట్టూ సిమెంట్‌ రోడ్లను కూడా నిర్మించారు. అలాగే విద్యుత్తు, నీటి సౌకర్యం కూడా కల్పించారు. విద్యుత్తు అంతరాయం ఉండకుండా నియంత్రిక కూడా ఏర్పాటు చేశారు. కానీ ఇంతవరకు లబ్ధిదారులకు పంపిణీ చేయకుండా తాత్సారం చేస్తున్నారు. ఏడాది క్రితం లబ్ధిదారుల ఎంపిక కోసం లాటరీ నిర్వహించాలని ఇళ్ల వద్దనే అధికారులు సమాయత్తం అయ్యారు. కానీ చాలా మంది వచ్చి దీనిని అడ్డుకున్నారు. అర్హుల పేర్లు లేవని మొత్తం ఇందులో అనర్హులే ఉన్నారని ఆందోళన చేయటంతో అధికారులు అక్కడి నుంచి వెళ్లిపోయారు. తర్వాత వాటి వైపు అధికారులు, ప్రజాప్రతినిధులు కన్నెత్తి కూడా చూడటం లేదు. పలుమార్లు పేదలు ఇళ్ల వద్దకు వెళ్లి నివాసం ఉండాలని చూస్తున్నారు. విషయం తెలుసుకొని అధికారులు వెళ్లి వారిని పంపిస్తున్నారు. రెండేళ్లుగా ఎప్పుడు ఇస్తారని చూస్తున్నా వారికి నిరాశే ఎదురవుతూ వస్తోంది. ప్రస్తుతం వీటిలో అసాంఘీక కార్యకలాపాలు కూడా జరుగుతున్నాయి. పంపిణీ చేస్తేనే ఎలాంటి సమస్యలేకుండా ఉంటుంది. అన్ని వసతులు కల్పించినా కూడా ఎందుకు ఇవ్వటంలేదని పేదలు వాపోతున్నారు.