ఓట్ల పండుగ.. కాసులు మెండుగా

సంగారెడ్డి బస్టాండ్‌లో ప్రయాణికుల రద్దీ (పాతచిత్రం)

న్యూస్‌టుడే, సంగారెడ్డి టౌన్‌ : ఎన్నికలు ఆర్టీసీకి కాసులు కురిపించాయి. ఓటు వేసేందుకు చాలామంది సొంతూళ్లకు వెళ్లడంతో ఆదాయం సమకూరింది. సొంత వాహనాలున్న వారు మినహా మిగతా వారంతా ఆర్టీసీ బస్సుల్లోనే ప్రయాణానికి మొగ్గు చూపారు. పోలింగ్‌కు రెండ్రోజుల ముందు నుంచే బస్సుల్లో రద్దీ పెరిగింది. నిత్యం రూ.కోటిపైగా ఆదాయం రావడం విశేషం. నవంబరు 28, 29, 30వ తేదీల్లో రీజియన్‌లోని అన్ని రూట్లలో బస్సులన్నీ కిక్కిరిసిపోయాయి. పోలింగ్‌ రోజు నారాయణఖేడ్‌ వైపు వెళ్లేవారు బస్సు టాపుపైనా ప్రయాణించారు.

మూడ్రోజుల్లో రూ.2.99 కోట్ల ఆదాయం..

ఉమ్మడి జిల్లాకు సంబంధించి మెదక్‌ రీజియన్‌ పరిధిలో 8 ఆర్టీసీ డిపోలున్నాయి. ఆయా డిపోల పరిధిలో 676 బస్సులుండగా.. నిత్యం సగటున 2.02 లక్షల కి.మీ తిప్పుతుంటారు. ఆదాయం సగటున రూ.86.85 లక్షలు వస్తుంది. ఎన్నికల వేళ అది రూ.కోటి దాటింది. రద్దీ ఎక్కువగా ఉండటంతో పోలింగ్‌కు రెండ్రోజుల ముందు అంటే 28వ తేదీన బస్సులను 2.25 లక్షల కి.మీ. తిప్పారు. ఆ ఒక్క రోజు ఆర్టీసీకి రూ.1.02 కోట్ల ఆదాయం వచ్చింది. 29వ తేదీ కి.మీ.లు తగ్గినా ఆదాయం మాత్రం అంతకుమించి రావడం విశేషం. 2.05 లక్షల కి.మీ. మాత్రమే బస్సులు తిరగ్గా రూ.1.03 కోట్లు వచ్చింది. పోలింగ్‌ రోజు (నవంబరు 30) ఆర్టీసీ ఉద్యోగులూ ఓట్లు వేసేందుకు వెళ్లడం తదితర కారణాలతో 1.57 లక్షల కి.మీ.లు తిప్పగా రూ.94.46 లక్షల ఆదాయం ఆర్టీసీ ఖాతాలోకి చేరింది. మూడ్రోజుల్లో రీజియన్‌కు రూ.2.99 కోట్ల ఆదాయం వచ్చింది.