ఓటు ఒక్కటి.. పోలింగ్‌ కేంద్రాలు రెండు

హుజూర్‌నగర్, హుజూర్‌నగర్‌ గ్రామీణం, న్యూస్‌టుడే: ఈ చిత్రంలో కన్పిస్తున్న పోల్‌ చిట్టీలో పోలింగ్‌ కేంద్రం పేరు వద్ద ఆంగ్లంలో ఒక కేంద్రం, తెలుగులో మరో కేంద్రం పేరు అచ్చయింది. ఇలాంటి పోల్‌ చిట్టీలు పట్టణంలో ఎక్కువ మంది పట్టభద్రుల ఓటర్లకు వచ్చినట్లు వారు చెబుతున్నారు. పట్టభద్రుల ఉప ఎన్నిక సందర్భంగా పంపిణీ చేస్తున్న పోల్‌ చిట్టీల్లో పోలింగ్‌ కేంద్రం చిరునామాలో తెలుగు, ఆంగ్లంలో రెండు వేర్వేరు చిరునామాలు అచ్చు వేశారు. దీంతో అసలు తాము ఏ కేంద్రంలో ఓటు వేయాలా అనే గందరగోళంలో ఉన్నారు. ఏది సరైందోనని వారు అధికారుల చుట్టూ తిరిగే పరిస్థితి ఉంది. కొన్ని పార్టీల నాయకులు ప్రచారం కోసం ఇళ్లకు వెళ్లినప్పుడు ఓటర్లు వారిని ప్రశ్నిస్తున్నారు. దీంతో ప్రచారం చేసే వారు కూడా అధికారుల దగ్గరకు వెళ్లడంతో, అధికారులు బూత్‌ల వారీగా ఓటర్ల జాబితా చూసి సంబంధిత పోలింగ్‌ కేంద్రానికి పోవాలని సూచిస్తున్నట్లు తెలిసింది.