logo

అరచేతిలో మేఘ సందేశం

వాతావరణంలో మార్పులను ఎప్పటికప్పుడు ప్రజలకు చేరవేసేందుకు కేంద్ర ప్రభుత్వం ప్రత్యేక యాప్‌లు రూపొందించింది. ప్రధానంగా వర్షకాలంలో వీటి ఉపయోగం ఎక్కువగా ఉండనుంది.

Updated : 22 May 2024 04:11 IST

రైతులకు బహుళ ప్రయోజనకరంగా ‘యాప్‌’లు

రాజపేట, ఆలేరు, న్యూస్‌టుడే: వాతావరణంలో మార్పులను ఎప్పటికప్పుడు ప్రజలకు చేరవేసేందుకు కేంద్ర ప్రభుత్వం ప్రత్యేక యాప్‌లు రూపొందించింది. ప్రధానంగా వర్షకాలంలో వీటి ఉపయోగం ఎక్కువగా ఉండనుంది. మెరుపులు, ఉరుముల నుంచి రక్షించుకోవడం, వర్షం ఎప్పుడు ఎక్కువగా కురిసే అవకాశముందో తెలుసుకుని దాని ప్రకారంగా నడుచుకునేందుకు వీలుగా భారత భూవిజ్ఞాన మంత్రిత్వ శాఖ రూపొందించిన ఈ యాప్‌లు రైతులకు ఎంతగానో దోహదపడతాయని చెప్పవచ్చు. ఆండ్రాయిడ్‌ మొబైల్‌లో ప్లేస్టోర్‌లోకి వెళ్లి ఆయా యాప్‌లను డౌన్‌లోడ్‌ చేసుకుంటే చాలు ఎప్పటికప్పుడు వాతావరణ సమాచారం మీ అరచేతిలో ఉన్నట్లే.

మెరుపు హెచ్చరిక ‘దామిని’

ఎప్పటికప్పుడు మెరుపు హెచ్చరికలను తెలియజేసేందుకు ‘దామిని’ యాప్‌ ఉపయోగపడుతుంది. మెరుపు ఎందుకు వస్తుంది. మెరుపు వచ్చినప్పుడు తీసుకోవాల్సిన జాగ్రత్తలను ఈ యాప్‌లో సవివరంగా వివరించారు. లొకేషన్‌ ఆధారంగా ఎక్కడెక్కడ మెరుపులు వచ్చే అవకాశముందో సూచిస్తుంది. పిడుగు పడినప్పుడు తోటివారికి అందించాల్సిన వైద్య సహాయం, శ్వాస ఆగిపోతే నోటి నుంచి శ్వాసను అందించడం, గుండె చప్పుడు ఆగిపోతే సీపీఆర్‌ చేయడం తదితర వివరాలతో పాటు పిడుగు పడినప్పుడు ప్రాథమికంగా చేయకూడనివి, చేయాల్సిన పనులను ఇందులో పేర్కొంటుంది.

వర్ష సూచనల ఎయిర్‌ ఈ అలారమ్‌.. 

ఎప్పటికప్పుడు వర్ష సూచనను ఈ యాప్‌ మీకు అందుబాటులో తెస్తుంది. నివసిస్తున్న ప్రాంతంలో వాతావరణం, వర్ష సూచనలతో పాటు ఇతర ప్రాంతాల్లో ఎక్కడెక్కడ ఏ స్థాయిలో వర్షాలు కురుస్తున్నాయో తెలియజేస్తుంది. వాతావరణంలోని ఉష్ణోగ్రత, మేఘావృతం తదితర అంశాలను నిలువరిస్తుంది. 

సమగ్ర వివరాలతో ‘మేఘదూత్‌’

మేఘదూత్‌ యాప్‌లో సమగ్ర సమాచారం అందుబాటులోకి వస్తుంది. వర్షపాతం, గాలిలో తేమ, వేగం, గాలి వచ్చే దిక్కు, ఉష్ణోగ్రత తదితర అంశాలను ఎప్పటికప్పుడు అప్‌డేట్‌ చేస్తుంది. వారం రోజుల ముందు రానున్న నాలుగు రోజుల వాతావరణం విశేషాలను సైతం ఈ యాప్‌లో తెలుసుకోవచ్చు. 

Tags :

Trending

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.

మరిన్ని