ముగిసిన పెంచలకోన బ్రహ్మోత్సవాలు

కోన నుంచి గోనుపల్లికి తరలిపోతున్న ఉత్సవమూర్తులు..

పెంచలకోన(రాపూరు), న్యూస్‌టుడే: జిల్లాలో ప్రసిద్ధ పుణ్యక్షేత్రమైన పెంచలకోనలోని లక్ష్మీనృసింహ స్వామి బ్రహ్మోత్సవాలు శనివారం రాత్రి గోనుపల్లిలో జరిగిన గ్రామోత్సవంతో వైభవంగా ముగిశాయి. ముందుగా పెంచలస్వామి ఆలయ ప్రాంగణంలో ఉత్సవమూర్తులు బ్రహ్మోత్సవాల ముగింపు పూజలందుకున్నారు.

ప్రత్యేక అలంకరణలో స్వామి అమ్మవార్లు

అనంతరం గోవిందనామ స్మరణలు, పలు రకాల వాయిద్యాలు, వేదపండితుల మంత్రోచ్ఛారణల మధ్య పెంచలస్వామి, ఆదిలక్ష్మి, చెంచులక్ష్మి ఉత్సవమూర్తులను పల్లకీలో ఉంచి అత్తగారిల్లైన గోనుపల్లి వరకు సుమారు మూడు కిలోమీటర్లు కాలినడకన భక్తులు ఊరేగించారు. భక్తులు కాయాకర్పూరం సమర్పించి మొక్కులు తీర్చుకున్నారు. యువత సంప్రదాయ నృత్యాలు, కేరింతలతో గ్రామంలో సందడి వాతావరణం నెలకొంది. అనంతరం పెంచలకోన ముఖద్వారం వద్ద ఉత్సవమూర్తులకు ఆలయ కార్యనిర్వహణాధికారి విజయసాగర్‌బాబు నేతృత్వంలో అర్చకులు, సిబ్బంది, భక్తులు కలిసి  వీడ్కోలు పలుకుతూ ప్రత్యేక కార్యక్రమాలు నిర్వహించారు.