రూ.7.21 లక్షల నగదు పట్టివేత

నిజామాబాద్‌ నేరవిభాగం, న్యూస్‌టుడే: జిల్లా కేంద్రం నాలుగో ఠాణా పరిధిలో ఎలాంటి అనుమతులు లేకుండా తరలిస్తున్న నగదు పట్టుకున్నట్లు ఏసీపీ రాజావెంకటరెడ్డి, నగర సీఐ నరహరి తెలిపారు. శుక్రవారం ఎల్లమ్మగుట్ట వద్ద ఎస్సైలు సంజీవ్‌, రామకృష్ణ తమ సిబ్బందితో తనిఖీలు నిర్వహిస్తుండగా మోర దీపక్‌ అనే వ్యక్తి ఎలాంటి ఆధారాలు లేకుండా రూ.7.21 లక్షలు తరలిస్తుండగా స్వాధీనం చేసుకున్నారు. నిజామాబాద్‌ ట్రెజరీలో జమచేసి, ఎన్నికల అధికారులకు సమాచారం అందించారు. ఎన్నికల కోడ్‌ నేపథ్యంలో పత్రాలు లేకుండా నగదు రవాణా చేస్తే చర్యలు తప్పవని ఏసీపీ హెచ్చరించారు.