తెరపైకి మరో మండలం

హన్మాజిపేట్‌ ఏర్పాటుకు రంగం సిద్ధం!
న్యూస్‌టుడే, బాన్సువాడ

ప్రధాన కూడలి

కొత్త మండలాల పరంపర కొనసాగుతూనే ఉంది. ప్రభుత్వం ఇటీవలే కోటగిరి మండలంలోని పొతంగల్‌ను ఏర్పాటు చేస్తూ జీవో జారీ చేసింది. తాజాగా బాన్సువాడలో హన్మాజిపేట్‌ తెరపైకి వచ్చింది. స్థానికుల విజ్ఞప్తి మేరకు సభాపతి పోచారం శ్రీనివాస్‌రెడ్డి కృషి చేస్తున్నట్లు చెబుతున్నారు. గ్రామాల తీర్మాన కాపీలు, జనాభా ఇతర వివరాలను పంపించాలని ఆయా జిల్లాల పాలనాధికారుల నుంచి స్థానిక రెవెన్యూ సిబ్బందికి ఆదేశాలు అందాయి. ఈ మేరకు అధికారులు ప్రతిపాదనలు సిద్ధం చేస్తున్నారు.

11 గ్రామాలతో..

బాన్సువాడ మండలంలో మొత్తం 25 పంచాయతీలు. మండలకేంద్రానికి సుమారు 25 కిలోమీటర్ల దూరంలో ఉన్న హన్మాజిపేట్‌ను ఏర్పాటు చేయాలని గతంలో ఆలోచన చేసినా.. ఆయా గ్రామాల సహకారం లేకపోవడంతో అడుగు ముందుకు పడలేదు. ఇటీవల పొతంగల్‌ ఏర్పాటుతో మరోసారి ప్రతిపాదన తీసుకొచ్చినట్లు తెలిసింది.

ఈ గ్రామాలతోనే..

కొత్త మండలంలో బాన్సువాడ నుంచి హన్మాజిపేట్‌తోపాటు కోనాపూర్‌, ఖాద్లాపూర్‌, సంగోజిపేట్‌, సోమ్లనాయక్‌తండా, పులిగుచ్చతండా, వర్ని మండలం నుంచి పైడిమల్‌, చింతల్‌పేట్‌, చిలుకతండా, గోకుల్‌దాస్‌తండా, సిద్ధాపూర్‌తండాను చేర్చాలని భావిస్తున్నారు. రెండు, మూడు రోజుల్లో ప్రతిపాదనను ప్రభుత్వానికి పంపనున్నారు.

మొత్తం ఐదు..

బాన్సువాడ నియోజకవర్గంలో ఇప్పటికే ఐదు కొత్త మండలాలు ఏర్పాటయ్యాయి. వర్నిలో మోస్రా, చందూర్‌, రుద్రూర్‌, కోటగిరిలో పొతంగల్‌, బీర్కూరులో నస్రుల్లాబాద్‌ నూతన మండలాలుగా కొలువుదీరాయి. హన్మాజిపేట్‌ ఏర్పాటైతే.. పాత బాన్సువాడ, బీర్కూరు, కోటగిరి, వర్నితో కలిపి మండలాల సంఖ్య 10కి చేరనుంది.

వివరాలు అడిగారు

గంగాధర్‌, తహసీల్దార్‌, బాన్సువాడ

హన్మాజిపేట్‌తోపాటు మరో ఐదు గ్రామాల వివరాలను కలెక్టర్‌ అడిగారు. తీర్మాన కాపీలు పంపిస్తున్నాం. కొత్త మండలం ఏర్పాటుకు ప్రభుత్వానికి ప్రతిపాదనలు పంపిస్తున్నట్లు తెలుస్తోంది.

స్థానికంగా అభివృద్ధి

- బోనాల సుభాష్‌, సర్పంచి, హన్మాజిపేట్‌

హన్మాజిపేట్‌ మండలంగా ఏర్పాటైతే ఇక్కడి ప్రాంతం అభివృద్ధి చెందుతుంది. ఇందుకు సభాపతి పోచారం శ్రీనివాస్‌రెడ్డి కృషి చేస్తారని భావిస్తున్నాం. ఇప్పటికే తీర్మానం చేసి అధికారులకు ఇచ్చాం.