ఖుర్దా సబ్‌ కలెక్టర్‌ కార్యాలయం వద్ద భాజపా ధర్నా

ఖుర్దా కలెక్టర్‌ కార్యాలయం వద్ద ధర్నా 

భువనేశ్వర్, న్యూస్‌టుడే: ఖుర్దా అసెంబ్లీ నియోజకవర్గ భాజపా అభ్యర్థి ప్రశాంతజగ్‌దేవ్‌ను ఉద్దేశపూర్వకంగా బిజద పెద్దలు ఇరికించి అరెస్టు చేయించి కారాగారానికి తరలించారని, వెంటనే విడుదల చేయాలని డిమాండ్‌ చేస్తూ భాజపా కార్యకర్తలు సోమవారం ఖుర్దా సబ్‌ కలెక్టరు కార్యాలయం ఎదుట ధర్నా చేపట్టారు. 25న జరిగిన మూడో విడత పోలింగ్‌లో బెలగడ కేంద్రానికి తన హక్కు వినియోగించుకోవడానికి వెళ్లిన జగ్‌దేవ్‌ ఈవీఎంను తోసేశారన్న ఆరోపణ వాస్తవం కాదని వారు నినాదాలు చేశారు. సీసీటీవీ పుటేజీ పరిశీలించకుండా ఏకపక్షంగా అరెస్టు చేసి జైలుకు తరలించడం కక్షపూరిత చర్యగా పేర్కొన్నారు. దీనిపై ఖుర్దా ఎస్పీ అవినాష్‌కుమార్‌ విలేకరులతో మాట్లాడుతూ డ్రిసైడింగ్‌ అధికారి ఫిర్యాదు మేరకు చర్యలు తీసుకున్నామని, పోలింగ్‌ ప్రక్రియ పూర్తయిన తరువాత సీసీటీవీ పుటేజ్‌ పరిశీలిస్తామన్నారు. మరోవైపు భాజపా నేత, బ్రహ్మపుర లోక్‌సభ అభ్యర్థి ప్రదీప్‌కుమార్‌ పాణిగ్రహి సోమవారం భువనేశ్వర్‌లో విలేకరులతో మాట్లాడుతూ ఓటమి భయంతో బిజద నేతలు హింసను ప్రేరేపిస్తున్నారని, తమకు విధేయులుగా ఉన్న పోలీసు అధికారులతో భాజపా నేతలపై కేసులు బనాయిస్తున్నారని ఆరోపించారు. హింజలిలో నవీన్‌ ఓటమి ఖాయమని, జగ్‌దేవ్‌ను ఉద్దేశపూర్వకంగా జైలుకు తరలించారని, బిజద దిగజారుడు రాజకీయాలు చూస్తున్న ప్రజలు ఆ పార్టీకి బుద్ధి చెబుతారన్నారు.