అవినీతికి కొమ్ము కాసిన సీఎం: ధర్మేంద్ర

ఎంపీ అభ్యర్థి నబచరణ్‌ మాఝిని పరిచయం చేస్తున్న ధర్మేంద్ర 

భువనేశ్వర్, న్యూస్‌టుడే: అవినీతి మూలాలు పెకిలిస్తామని తొలినాళ్లలో చెప్పుకున్న నవీన్‌ అవినీతిపరులకు కొమ్ము కాసి రాష్ట్రాన్ని భ్రష్టు పట్టించారని కేంద్రమంత్రి ధర్మేంద్ర ప్రధాన్‌ దుయ్యబట్టారు. సోమవారం మయూర్‌భంజ్‌ జిల్లా కేంద్రం బరిపదలో జరిగిన ఎన్నికల సభలో ఆయన మాట్లాడారు. నవీన్‌ పాలనలో బిజద నేతలు, కొందరు అధికారులు కోట్లాది రూపాయలు సంపాదించారన్నారు. ఇసుక, ఖనిజాలు, బొగ్గు దోపిడీ అవుతున్నా రాష్ట్రంలో పట్టించుకునేవారే కరవయ్యారన్నారు. తమిళనాడు గుమస్తాకు పాలనా బాధ్యతలు అప్పగించేసిన నవీన్‌కు రాష్ట్రంలో ఏం జరుగుతోందో తెలియవన్నారు. 25 ఏళ్లలో మాతృభాష నేర్చుకోలేకపోయిన సీఎం సహాయకులు రాసిచ్చిన నాలుగు వాఖ్యాలు చెప్పే దుస్థితి దాపురించిందన్నారు. విజ్ఞతగల ఓటర్లు ఈసారి మార్పునకు శ్రీకారం చుట్టాలని, మోదీ గ్యారంటీ పట్ల నమ్మకం పెంచుకుని భాజపాకు అవకాశమివ్వాలన్నారు. ఈ జిల్లా గిరిపుత్రిక ద్రౌపదీ ముర్ముకు రాష్ట్రపతి పదవి వరించిందని, ఈ ప్రాంతానికి కేంద్రం ఎంతో చేసిందన్నారు.