బస్సులన్నీ సీఎం సభకే

మండుటెండలో ప్రయాణికుల అవస్థలు

 విజయనగరం కోట, న్యూస్‌టుడే: ముఖ్యమంతి జగన్‌మోహన్‌రెడ్డి సభలకు ఆర్టీసీ బస్సులను తరలిస్తుండడంతో ప్రయాణికులు తీవ్ర ఇబ్బందులు పడుతున్నారు.  జిల్లా నుంచి శుక్రవారం కాకినాడకు 45 సర్వీసులు వెళ్లగా.. శనివారం అనకాపల్లి సభ కోసం ఏకంగా 90 బస్సులను పంపించారు. ఇందులో విజయనగరం, ఎస్‌.కోట డిపోల నుంచే 50 శాతానికి పైగా ఉన్నాయి. దీంతో రెండు డిపోల వద్ద ప్రయాణికులు గంటల తరబడి ఎండలో నిల్చున్నారు. కొన్ని సర్వీసులు అందుబాటులో ఉన్నా గమ్యస్థానాలు చేరేందుకు గంట నుంచి రెండు గంటల సమయం పట్టిందని కొందరు ప్రయాణికులు మండిపడ్డారు. పార్వతీపురం మన్యం నుంచి 128 బస్సులను తరలించడం గమనార్హం.