కాలువలు నిర్మించారు.. కుళాయిలు మూసేశారు!

బలిజిపేట: బలిజిపేట మండల కేంద్రానికి శివారున ఉన్న గంగాడ గ్రామంలోని కోమటివీధి, షరాబులవీధుల్లో తాగునీటి సమస్య తీవ్రంగా ఉందని ఆ వీధిప్రజలు ఆ సమస్యను ఈనాడు జనవాణికి సమాచారమందించారు. ఈ రెండు వీధుల్లో వీధి కాలువలు నిర్మించిన సమయంలో పంచాయతీ అధికారులు ఈ ప్రదేశంలో ఉన్న కుళాయిలను, వాటి పైపులను కప్పేశారు. దీంతో ఈ రెండు వీధుల్లోని ప్రజలకు తాగునీటి కోసం పక్క వీధులకు వెళ్లాల్సి వస్తోందని, ఈ సమస్యను సత్వరమే పరిష్కరించాలని వారు తెలియజేశారు. ఈ అంశంపై ఎంపీడీవో రమేష్‌నాయుడును ‘న్యూస్‌టుడే’ వివరణ కోరగా, ఈ కాలువలను పరిశీలించి, తదుపరి చర్యలు చేపడతామన్నారు.