లబ్ధిదారులను మభ్యపెడుతున్న వాలంటీర్లు

వాలంటీర్లు పిలిచారని చెబుతున్న మహిళలు

లక్కవరపుకోట, న్యూస్‌టుడే: రాజీనామాలు చేసిన వాలంటీర్లు ఇంకా కొనసాగుతున్నట్లు ప్రజలను మభ్యపెడుతున్నారని పలువురు విమర్శిస్తున్నారు. మండలంలోని రంగరాయపురానికి చెందిన వాలంటీర్లలో ఒకరు తప్ప మిగిలిన వారు రాజీనామా చేశారు. వారు స్వేచ్ఛగా వైకాపాకు పనిచేయవచ్చు అనుకున్నారేమో.. బుధవారం రాత్రి ఆ పార్టీ నేతల సూచనలతో లబ్ధిదారుల ఇళ్లకు వెళ్లి.. శివాలయం వద్దకు వస్తే మిగిలిన చేయూత డబ్బు వస్తుందంటూ మభ్యపెట్టి మహిళలను పిలిచారు. వాలంటీర్లు రాజీనామా చేసినట్లు వారికి తెలియకపోవడంతో వారంతా శివాలయం వద్దకు చేరుకున్నారు. ఈ విషయం తెదేపా కార్యకర్తలు చెప్పగా కొందరు వెనుదిరిగారు. మరికొందరు సమావేశానికి వెళ్లారు. రాజీనామా చేసిన వాలంటీర్లు ఈ విధంగా వ్యవహరించడంపై ఎంపీడీవో కె.రూపేష్‌ని వివరణ కోరగా.. ప్రభుత్వ పథకాలపై మభ్యపెట్టడం కోడ్‌ ఉల్లంఘన కిందకు వస్తుందని, గురువారం ఉన్నతాధికారుల దృష్టికి తీసుకువెళ్లి చర్యలు చేపడతామన్నారు.