అట్టహాసంగా జయకృష్ణ నామినేషన్‌

ఆర్వో శుభమ్‌ బన్సల్‌కు నామపత్రం అందజేస్తున్న జయకృష్ణ

సీతంపేట, పాలకొండ, న్యూస్‌టుడే: పాలకొండ నియోజకవర్గం నుంచి కూటమి అభ్యర్థిగా నిమ్మక జయకృష్ణ అట్టహాసంగా బుధవారం నామినేషన్‌  వేశారు. ముందుగా పాలకొండలోని కోటదుర్గమ్మ సన్నిధిలో ప్రత్యేక పూజలు చేసి సీతంపేటకు బయలు దేరారు. అక్కడ వారపు సంత కూడలి నుంచి ప్రధాన రహదారి మీదుగా తెదేపా, జనసేన, భాజపా శ్రేణులతో భారీ ర్యాలీగా ఐటీడీఏ కార్యాలయానికి చేరుకున్నారు. అనంతరం ప్రతిపాదకులతో కలసి జయకృష్ణ లోపలికి వెళ్లి నియోజకవర్గ రిటర్నింగ్‌ అధికారి ఎస్‌.హెచ్‌.శుభమ్‌ బన్సల్‌కు నామపత్రాలను అందజేశారు. పాలకొండ డీఎస్పీ జి.వి.కృష్ణారావు ఆధ్వర్యంలో సీఐ ఎం.చంద్రమౌళి, ఎస్సై జగదీశ్‌నాయుడు తదితరులు బందోబస్తు నిర్వహించారు.

సీతంపేటలో ఐటీడీఏ కార్యాలయానికి కూటమి కార్యకర్తల ర్యాలీ